विराटनगर । नेपाली राष्ट्रिय क्रिकेट टोलीले त्रिकोणात्मक टी-२० सिरिजको पहिलो खेल नामिबियासँग खेल्ने भएको छ ।
नेपाल क्रिकेट संघ (क्यान)ले शुक्रबार सिरिजको खेल तालिका सार्वजनिक गर्दै नेपालको पहिलो प्रतिद्वन्द्वी नामिबिया हुने जनाएको हो ।
नेपाल र नामिबियाबीचको खेल कीर्तिपुरस्थित त्रिवि क्रिकेट मैदानमा आगामी फागुन १५ गते हुने छ ।
नेपालले दोस्रो खेल फागुन १६ गते नेदरल्यान्ड्ससँग खेल्नेछ भने लिग चरणको तेस्रो खेल फागुन १८ गते नामिबियासँग खेल्ने छ ।
यस्तै, लिग चरणको अन्तिम खेल फागुन १९ गते नेदरल्याण्ड्ससँग खेल्ने तय भएको छ । फागुन २२ गते सिरिजको फाइनल खेल हुने छ ।
डबल राउन्ड रोबिनका आधारमा हुने उक्त सिरिज नेपालमा यसै सातादेखि सुरु हुने छ ।
आइसिसी क्रिकेट विश्वकप लिग–२ खेल्न नामिबिया र नेदरल्यान्ड्सको क्रिकेट टोली नेपाल आउँदै छ ।
आइसिसी टी–२० विश्वकप, २०२४ का लागि छनोट भएको नेपालले प्रतियोगिताको तयारीका लागि लगातार दुईवटा सिरिज खेल्न लागेको हो ।
नेपालले अहिले क्यानडासँग तीन खेलको एकदिवसीय अन्तर्राष्ट्रिय सिरिज खेलिरहेको छ ।
क्यानडासँगको तीन खेलको एकदिवसीय अन्तर्राष्ट्रिय सिरिजलगत्तै नेपालले विश्वकप लिग–२ अन्तर्गत त्रिकोणात्मक सिरिज खेल्ने छ ।
उक्त सिरिज आगामी फागुन ३ देखि १३ गतेसम्म चल्ने छ ।
लिग–२ त्रिकोणात्मक सिरिजका लागि नेपाली टोलीको घोषणा यसअघि नै भइसकेको छ ।
उक्त टोलीको कप्तानमा रोहितकुमार पौडेल तथा अन्य खेलाडीमा आसिफ शेख, कुशल भुर्तेल, कुशल मल्ल, आरिफ शेख, पवन सर्राफ, भीम सार्की, अर्जुन साउद, दीपेन्द्रसिंह ऐरी, गुलशन झा, सोमपाल कामी, करण केसी, ललित राजवंशी, सूर्य तामाङ र रिजन ढकाल तथा वैकल्पिक खेलाडीमा प्रतिस जिसी, देव खनाल, अनिल शाह र विवेक यादव रहेका छन् ।
