विराटनगर । नेपाली राष्ट्रिय क्रिकेट टोलीका पूर्वकप्तान पारस खड्काले खेलबाट सन्न्यास लिएको ३० महिना पुग्यो ।
धेरैलाई आश्चर्यमा पार्दै पारसले २०७८ साउनमा अन्तर्राष्ट्रिय क्रिकेटबाट संन्यासको घोषणा गरेका थिए ।
करिब दुई दशकको क्रिकेट करियर अन्त्य गरेका पारस अब पुन: क्रिकेट खेल्न तयारीमा छन् ।
क्यानका सचिवसमेत रहेका पारसले रुपन्देहीमा निर्माणाधीन एक्स्ट्राटेक ओभल क्रिकेट मैदानको उद्घाटन कार्यक्रममा हुने मैत्रीपूर्ण क्रिकेट प्रतियोगिता खेल्न लागेका हुन् ।
मैदान उद्घाटनको क्रममा चार टोलीबीच टी-१० प्रतियोगिता आयोजना हुने छ, फागुन १४ गते हुने उद्घाटन खेलमा पारसले पनि खेल्ने छन् ।
उक्त अवसरमा सोही मैदानमा नेपालको पहिलो अन्तर्राष्ट्रिय क्रिकेट खेलेको सन् १९९६ को टोली, सन् २०१४ को टी–२० विश्वकप खेलेको नेपाली टोली, रुपन्देही लेजेन्ड्स र रेस्ट अफ नेपालबिच क्रिकेट प्रतियोगिता हुने छ ।
पूर्व कप्तान पारसले सन् २०१४ टोलीको कप्तानी गर्ने छन् ।
पारस नेपाली क्रिकेटमै सम्भवत: सबैभन्दा उत्कृष्ट खेलाडी हुन् ।
सन् २००२ मा उमेर समूहबाट क्रिकेट खेल्न सुरु गरेका पारसले सन् २००४ मा इन्टरकन्टिनेन्टल कपमार्फत सिनियर टिममा डेब्यु गरेका थिए ।
सन् २००९ मा २२ वर्षको उमेरमै सिनियर टिमको कप्तान बनेका पारसले आफ्नो नेतृत्वमा नेपाललाई धेरै उपाधि र उपलब्धी दिलाएका थिए ।
सन् २०२० मार्चमा थाइल्यान्डमा एसिसी टी-२० इस्टर्न रिजन नै राष्ट्रिय टिममा पारसको लागि अन्तिम खेल बनेको थियो ।
