विराटनगर । मोरङ क्रिकेट संघले राष्ट्रिय टी–२० च्याम्पियनसिपको घोषणा गरेको छ । बिहीबार विराटनगरस्थित श्रीकृष्ण होटलमा पत्रकार सम्मेलनको आयोजना गर्दै संघले च्याम्पियनसिपको घोषणा गरेको हो ।
नेपाल क्रिकेट संघ (क्यान) र कोशी प्रदेश सरकारसँगको समन्वयमा उक्त प्रतियोगिताको आयोजना गर्न लागिएको संघले जनाएको छ । विराटनगर महानगरपालिका–१९ स्वर्गीय गिरिजाप्रसाद कोइराला खेल मैदान (वैजनाथपुर क्रिकेट मैदान) प्रतियोगिता आयोजना गर्ने संघको तयारी छ ।
विराटनगरमा पहिलोपटक आयोजना हुन आँटेको यो प्रतियोगिता आगामी फागुन २२ गतेदेखि चैत गतेसम्म हुने बताइएको छ । प्रतियोगितामा सातै प्रदेश र तीन विभागीय टोली गरी १० टोलीको सहभागिता रहने मोरङ क्रिकेट संघका अध्यक्ष मोहम्मद साद कुरैशी (बाबु)ले जानकारी दिए ।
प्रतियोगितामा जम्मा २३ वटा खेलहरू हुने छन् ।
उनका अनुसार प्रतियोगिताको प्रत्यक्ष प्रसारण राष्ट्रियस्तरको टेलिभिजनबाट गरिने छ । ‘विराटनगरबाट प्रतिभावान खेलाडी उत्पादन गर्ने लक्ष्यका साथ यहाँ पहिलोपटक यो स्तरको प्रतियोगिता गर्न आँटेका हौं,’ उनले भने, ‘यहाँको प्रतिभा राष्ट्रिय र अन्तर्राष्ट्रियस्तरमा देखियोस् भन्ने हाम्रो उद्देश्य हो ।’
क्यानको क्यालेन्डरमा समावेश गरिसकिएकोले प्रतियोगितालाई प्रत्येक वर्ष निरन्तरता दिइने प्रदेश क्रिकेट संघका अध्यक्ष सर्वजितराज पाण्डेले जानकारी दिए ।
प्रतियोगितामा कोशी प्रदेश सरकार र क्यानको सहयोग रहनेमा आफूहरू आशावादी रहेको उनले सुनाए ।
राष्ट्रिय टोलीका परिचित केही खेलाडीहरूले प्रतियोगितामा सहभागिता जनाउने बताइएको छ । ती खेलाडीको नाम र ट्रफी चाँडै नै अर्को पत्रकार सम्मेलनको आयोजना गरेर खुलाइने आयोजकको भनाइ छ ।
प्रतियोगिता सम्पन्न गर्न करिब ७५ लाख लाग्ने आयोजकको अनुमान छ ।
