विराटनगर । नेपाली राष्ट्रिय महिला टोलीकी चर्चित फरवार्ड सावित्रा भण्डारी ‘साम्बा’ ले फ्रान्सको शीर्ष डिभिजनको लिग खेल्ने पक्का भएको छ ।
२६ वर्षीया साम्बाले फ्रान्सको माथिल्लो डिभिजनको क्लब अन आभान्ट ग्वेङगाम्पबाट खेल्ने निश्चित भएको हो ।
सावित्रा बिहीबार सो क्लबसँग औपचारिक रूपमा अनुबन्ध भएकी हुन् ।
फ्रान्सेली क्लबसँग खेल्ने यसै साताको सुरुमा उनी फ्रान्सतर्फ गएकी थिइन् ।
क्लबले अनुबन्धपछि सावित्राको भिडियो क्लिप पनि सार्वजनिक गरेको छ ।
युरोपेली महिला फुटबलमा फ्रान्सको लिग माथिल्लो स्तरको मानिन्छ ।
अहिले ग्वेङगाम्प लिग तालिकाको दसौं स्थानमा छ । क्लबले १२ खेलबाट आठ अंक जोडेको छ ।
यसअघि उनले इजरायलको हापोएल रानानाबाट खेलेकी थिइन् ।
यसै सिजन मात्र इजरायली क्लबबाट घरेलु लिग खेलेकी उनी युरोपको शीर्ष डिभिजन लिग खेल्ने पहिलो नेपाली खेलाडीसमेत हुन् ।
इजराइलमा खेल्दै गर्दा त्यहाँ भएको द्वन्द्वका कारण लिग रोकिएको थियो, जसका कारण उनी स्वदेश फर्किएकी थिइन् ।
यसअघि उनले इन्डियन्स वुमेन्स लिगमा सनसनी मच्चाएकी थिइन् । उनले २०२२-२३ को सिजनमा चार ह्याट्रिकसहित २९ गोल गरेर इतिहासमेत रचेकी थिइन् ।
त्यस्तै लिगमा ३ सिजन खेलेकी साम्बाको नाममा सबैभन्दा बढी गोल गर्ने रेकर्डसमेत छ ।
उनले इन्डियन वुमेन्स लिगमा ५९ गोल गरेकी छिन् । उनीपछि चार सिजन खेलेकी बाला देवीको नाममा ४८ गोल रहेको छ ।
अन्तर्राष्ट्रिय फुटबलमा सर्वाधिक ४३ गोल गरिसकेकी साम्बा घरेलु फुटबलमा विभागीय टोली एपिएफबाट खेल्छिन् ।
