काठमाडौं । नेपाल क्रिकेट संघ (क्यान) ले आईसीसी पुरुष यू–१९ विश्वकप क्रिकेट खेल्ने टोलीको घोषणा गरेको छ ।
यू–१९ विश्वकप जनावरी १९ देखि फेब्रुअरी ११ सम्म दक्षिण अफ्रिकामा हुँदै छ ।
बिहीबार क्यानले यू–१९ विश्वकपका लागि देव खनालको कप्तानीमा १५ सदस्यीय टोलीको घोषणा गरेको हो ।
नेपाली टोलीमा खनालसँगै, अर्जुन कुमाल, आकाश त्रिपाठी, दीपकप्रसाद डुम्रे, दुर्गेश गुप्ता, गुलशनकुमार झा, दिपेशप्रसाद कँडेल, बिशालविक्रम के.सी, सुभाष भण्डारी, दीपक बोहरा, दीपक बोहरा, उत्तमरंगु थापा, बिपिन रावल, तिलकराज भण्डारी र आकाश चन्द रहेका छन् ।
आगामी १९ जनवरी देखि ११ फेब्रुअरीसम्म दक्षिण अफ्रिकामा हुने विश्वकपमा नेपालसहित १६ देशले प्रतिस्पर्धा गर्दै छन् ।
१६ देशलाई चार समूहमा विभाजन गरेर प्रतियोगिताको आयोजना हुँदै छ।
नेपाल समूह ‘डी’ मा रहेर पाकिस्तान र न्युजिल्यान्डसँगै अफगानिस्तानको सामना गर्ने छ ।
पहिलो खेलमा नेपालले २१ जनवरीमा न्युजिल्यान्डसँग खेल्ने छ ।
हरेक समूहका शीर्ष तीन टोली अघिल्लो चरण प्रवेश गर्नेछन् ।
टोलीले विश्वकपअघि दुई अभ्यास खेल खेल्ने भएको छ ।
यू-१९ क्रिकेट टिमका मुख्य प्रशिक्षक जगत् टमाटाले नेपालले स्कटल्यान्ड र नामिबियासँग अभ्यास खेल खेल्ने बताएका हुन् ।
अभ्यास र वार्म अप खेलका लागि नेपाली टिम जनवरी ५ मा दक्षिण अफ्रिका जान लागेको छ ।
