विराटनगर । मोरङको ग्रामथान गाउँपालिकामा प्रथम संस्करणको ग्रामथान भेट्रान फुटबल प्रतियोगिता आजबाट सुरु भएको छ ।
स्वास्थ्यका लागि खेलकूद, राष्ट्रका लागि खेलकुद भन्ने नारासहित ग्रामथान–३ सिद्राहास्थित वाणी माविको मैदानमा पुस १४ गते शनिबारदेखि उक्त प्रतियोगिता सुरु भएको हो ।
ग्रामथान गाउँपालिका प्रमुख जयप्रकाश गच्छादार र उपप्रमुख गुणावती देवी थारूले उद्घाटन गर्दै प्रतियोगिताको थालनी गरेका हुन् ।
ग्रामथान गाउँपालिकाको सहयोग तथा जनक मेमोरियल सेकेन्डरी बोर्डिङ स्कुललगायत १७ सङ्घ–संस्थाको प्रायोजनमा फुटबल प्रतियोगिता आयोजना भएको हो ।
१२ टोलीको सहभागिता रहेको प्रतियोगिताको फाइनल खेल पुस २५ गते हुने छ ।
प्रतियोगितामा युनाइटेड भेट्रान क्बल, विराटचोक भेट्रान क्लब, जाँते भेट्रान क्लब, धरान भेट्रान क्लब, दुहबी भेट्रान क्लब, मिल्स भेट्रान क्बल, इटहरीको जनता भेट्रान क्लब, विराट मेगा भेट्रान क्लब, जनता भेट्रान क्लब, ग्रामथान भेट्रान क्लब र गछिया भेट्रान क्लब सहभागी छन् ।
प्रतियोगिताको उदघाटन खेलमा बोराबाँध भेट्रान क्लब र हाम्रो इटहरी भेट्रान क्लबबीच प्रतिस्पर्धा भएको थियो ।
शनिबार दिउँसो भएको उद्घाटन समारोहमा जनक मेमोरियलका विद्यार्थीहरूले विशेष प्रस्तुतिका रूपमा थारू संस्कृति झल्काउने नृत्य प्रस्तुत गरेका थिए ।
नकआउटको आधारमा हुने प्रतियोगिताको विजेता टोलीले नगद रु ५० हजार रुपैयाँ र दोस्रो हुनेले नगद ३० हजार रुपैयाँसहित आकर्षक ट्रफी पाउने बताइएको छ ।
