टीकापुर । रुस-युक्रेन युद्धमा मृत्यु भएका टीकापुरका भरतबहादुर शाहको अन्त्येष्टि गरिएको छ ।
भौतिक शव नहुँदा कुशको शव बनाएर उनको आइतबार कर्णाली नदीमा अन्तिम संस्कार गरिएको हो ।
रुस-युक्रेन युद्धमा रुसको तर्फबाट खटिएका शाहको गत मङ्सिर ११ गते मृत्यु भएको थियो ।
रुसको तर्फबाट युक्रेनको भूमिमा खटिएका बेला ड्रोन आक्रमणमा परी उनको मृत्यु भएको हो ।
शाह २०८० साउन ३० गते दुबईबाट एक हप्ताको लागि कमन टुरिस्ट भिसामा मस्कोस्थित निकुलीनस्कायामा गएका थिए ।
रुस पुगेर रुसी सेनामा प्रवेश गरेका शाहको ठेगाना दुबईको अबुधावी अन्तर्राष्ट्रिय विमानस्थलमा कार्यरत प्रहरी भनेर राखिएको छ ।
टीकापुर नगरपालिका –१ नयाँ टीकापुर गाउँका ३६ वर्षीय शाह साढे तीन वर्ष अघिदेखि दुबई पुलिसमा काम गरिरहेका थिए ।
नेपालमा १० वर्ष ट्राफिक प्रहरीको जवान पदमा काम गरेका शाहको मृत्यु भएको जानकारी ढिलोगरी परिवारले पाएका थिए ।
शाहको मृत्युको पुष्टि साथीबाट ढिलो भएकाले हिन्दू परम्पराअनुसार अन्तिम संस्कार थालिएको उनका बुबा कुलबहादुर शाहले बताए ।
शाहसँगै कार्यरत नेपाली साथीले शव गाडेको आफ्नै आँखाले देखेको बताएपछि मात्र विश्वास गरेर अन्तिम संस्कार थालिएको हो ।
युद्ध भूमिमा रहँदा सम्पर्कविहीन भए पनि घाइते भएर अस्पताल पुगेका बेला शाहका साथीले नेपालमा सम्पर्क गरी जानकारी गराएका थिए ।
मृतक शाहका चार वर्षको छोरा र डेढ महिनाकी छोरी छन् । शाहले रुस पुगेपछि दुई लाख ५० हजार रुपैयाँ घर पठाएका थिए ।
शाहसँग ३० जनाको समूह रहेको र त्यहाँ ठूलो संख्यामा नेपाली रहेका बताएका छन् ।
