अखिल नेपाल फुटबल सङ्घ (एन्फा)ले क्याम्प छाडेर बाहिरिएका दश सिनियर राष्ट्रिय फुटबल खेलाडीलाई टोलीमा फिर्ता बोलाउने निर्णय गरेको छ ।
नवनिर्वाचित एन्फा कार्यसमितिको पहिलो बैठकले गरेका सात निर्णयमध्ये निर्णय नम्बर चारमा खेलाडीलाई फिर्ता बोलाउने निर्णय गरिएको छ ।
एएफसी एसियन कप छनोटको बन्द प्रशिक्षणका क्रममा प्रशिक्षक अब्दुल्लाह अलमुताइरीले प्रशिक्षण छाडेर जान निर्देशन दिएको भन्दै १० खेलाडीले गत वैशाख १३ गते प्रशिक्षण छाडेका थिए ।
त्यसपछि सञ्चारमाध्यम र सामाजिक सञ्जालमा खेलाडी–प्रशिक्षक विवाद विषयले निकै चर्चा पाए पनि तत्कालिन कर्मा छिरिङ शेर्पा नेतृत्वको एन्फाले यस विषयमा खासै ध्यान दिएको थिएन ।
तर सोमबार सम्पन्न एन्फाको २१औं चुनावी साधरणसभाबाट पंकज विक्रम नेम्वाङ एन्फा नेतृत्वमा आएसँगै खेलाडीलाई टोलीमा फिर्ता बोलाउने निर्णय गरेको हो ।
प्रशिक्षकको हकमा भने खेलाडी–प्रशिक्षक विवादपछि गठित कार्यदलले दिएको सुझाव र कतार फुटबल सङ्घसँग समन्वय गरी सचिवालयलाई निर्देशन दिने बताइएको छ ।
