इङ्लिस प्रिमियर लिग फुटबलको उपाधि म्यानचेस्टर सिटीले जितेको छ । घरेलु मैदानमा आइतबार राति भएको लिगको अन्तिम खेलमा एस्टन भिल्लालाई ३–२ गोलले हराउँदै सिटी च्याम्पियन बनेको हो ।
सिटीको यो समग्रमा छैटौं प्रिमियर लिग उपाधि हो । रोमाञ्चक खेलमा सिटीले दुई गोलले पछि परेको स्थितिलाई उल्ट्याउँदै पुनरागमन जित निकाल्यो ।
सिटीको जितमा इल्के गुन्डोगानले दुई तथा रोड्रीले एक गोल गरे । एस्टन भिल्लाका म्याटी क्यास र फिलिप कोउटिन्होले गोल गरेका थिए।
खेलमा सुरुवाती अग्रता एस्टन भिल्लाले लिएको थियो । म्याटी क्यासले ३७औं मिनेटमा गोल गर्दै एस्टन भिल्लालाई अग्रता दिलाए ।
कोउटिन्होले ६९औं मिनेटमा गोल गर्दै पाहुना टोलीको अग्रता दोब्बर बनाए । त्यसपछि जोसिएको सिटीले ७६औं मिनेटमा पहिलो गोल फर्काएको थियो ।
गुन्डोगानले रहिम स्टर्लिङको पासमा गोल गर्दै सिटीलाई खेलमा फर्काउने प्रयास गरे । दुई मिनेट लगत्तै रोड्रीले गोल गर्दै खेललाई बराबरीमा ल्याए । ८१औं मिनेटमा गुन्डोगानले गोल गर्दै सिटीको उपाधि पक्का बनाए।
जितसँगै सिटीले ३८ खेलमा ९३ अंक बनायो । पराजित एस्टन भिल्ला ४५ अंकसहित १४औं स्थानमा रह्यो । यता उपाधि जित्न सिटीको नतिजा पर्खिएको लिभरपुलले पनि अन्तिम खेलमा वल्भ्सलाई ३–१ गोलले हरायो । जितसँगै दोस्रो भएको लिभरपुलले ३८ खेलबाट ९२ अंक बनायो । पराजित वल्भ्स ५१ अंक सहित १०औं स्थानमा रह्यो ।
अन्य खेलमा चेल्सीले वाटफोर्डलाई २–१ तथा टोट्टनहामले नर्विच सिटीमाथि ५–० गोलको सानदार जित निकाल्दै च्याम्पियन्स लिगमा स्थान बनायो । चेल्सी तेस्रो र टोट्टनहाम चौथो स्थानमा रह्यो । यस सिजन नर्विच सिटी, वाटफोर्ड र वर्नली रेलिगेसनमा परेको छ ।
