नेपाली राष्ट्रिय फुटबल टोलीका प्रशिक्षक अब्दुल्लाह अलमुताइरी र खेलाडीबीचको विवाद छानबिन गर्न समिति गठन गरिएको छ ।
प्रशिक्षक अलमुताइरी र बन्द प्रशिक्षणमा रहेका सिनियर खेलाडीबीच देखिएको विवादको विषयमा सत्यतथ्य छानबिन गर्नका लागि अखिल नेपाल फुटबल सङ्घ (एन्फा) ले तीन सदस्यीय छानबिन समिति गठन गरेको हो ।
एन्फाको आइतबार बसेको कार्यसमिति बैठकले नेपाली सेनाका पूर्वउपरथी तथा पूर्वखेलाडी भिक्टर राणाको संयोजकत्वमा तीन सदस्सीय छानबिन समिति गठन गरेको हो ।
समितिमा पूर्वखेलाडी बिदुर विष्ट र नेपाल राष्ट्रिय तथा अन्तर्राष्ट्रिय खेलाडी सङ्घका उपाध्यक्ष दीपक थापा रहेका छन् ।
समितिले सात दिनभित्र छानबिन गरी एन्फालाई प्रतिवेदन बुझाउने उल्लेख छ ।
रोहिच चन्दसहित १० खेलाडीले प्रशिक्षक अल्मुताइरीको कार्यशीलै प्रति असन्तुष्ट जनाउँदै विद्रोह गरेर वैशाख १३ गते प्रशिक्षण क्याम्प छाडेका थिए ।
नेपाली फुटबल टोली अहिले कुवेतमा जुन ८ देखि १४ तारिखसम्म आयोजना हुने एएफसी एसिया कप छनोट तेस्रो चरणको तयारीका लागि बन्द प्रशिक्षणमा रहेको थियो ।
एसिया कप छनोटको तयारीका लागि नेपाली टोलीले जेठ ११ र १५ गते कतारको दोहामा अफगानिस्तानसँग मैत्री पूर्ण फुटबल समेत खेल्न लागेको छ ।
प्रशिक्षक अल्मुताइरीले सुरुमा २५ जना खेलाडी छनोट गरी बन्द प्रशिक्षण र तयारी सुरु गरेका थिए ।
तर १० खेलाडीले विदोह गरेर प्रशिक्षण क्याम्प छाडेपछि प्रशिक्षकले १७ जना खेलाडी थपेर प्रशिक्षणलाई निरन्तरता दिएका छन् ।
एएफसी एसिया कप छनोटमा नेपाल समूह ‘ए’ मा रहेको छ ।
तुलनात्मक रुपमा नेपालका लागि यो कठिन समूह पनि हो ।
यस समूहमा नेपालसँगै कुवेत, जोर्डन र इन्डोनेसिया रहेको छ ।
समूहको शीर्षटोली र पाँच समूहको उत्कृष्ट उपविजेता टोली सन् २०२३ मा चीनमा आयोजना हुने एसिया कपमा छनोट हुनेछन् ।
छनोट अघि टोलीका सिनियर खेलाडीले बिद्रोह गरेपछि एन्फा ब्यवस्थापन अहिले थप अफ्ठेरोमा परेको छ ।
