इन्डियन प्रिमियर लिग (आइपिएल)को आइतबार भएको खेलमा दिल्ली क्यापिटल्सले मुम्बई इन्डियन्सलाई पराजित गरेको छ ।
ब्राबोर्न स्टेडियममा सम्पन्न खेलमा दिल्लीले मुम्बईमाथि ४ विकेटको जित निकालेको हो । १० बलको खेल बाँकी छँदै दिल्ली जितसम्म पुगेको थियो ।
जितका लागि १ सय ७८ रनको लक्ष्य पाएको दिल्लीले १८ दशमलव २ ओभरमा ६ विकेट गुमाएर १ सय ७९ रन बनायो ।
दिल्लीका लागि ललित यादवले सर्वाधिक ४८ रन बनाए र नटआउट रहे ।
उनले ३८ रन बनाएका अक्षर पटेलसँग सातौं विकेटका लागि निर्णायक ७५ रनको साझेदारी गरे ।
जुन साझेदारी नै जितको आधार बन्यो ।
ललितले चार चौका र दुई छक्का प्रहार गरे ।
अक्षरले दुई चौका र तीन छक्का प्रहार गरेका थिए ।
दिल्लीका लागि पृथ्वी सले ३८ रनको योगदान दिए ।
बलिङतर्फ दिल्लीका कुलदीप यादवले ३ विकेट लिँदा खलिल अहमेदले २ विकेट लिए।
त्यसअघि मुम्बईका लागि प्रारम्भिक ब्याट्सम्यान इसान किसनले सर्वाधिक ८१ रन बनाए र नटआउट रहे ।
उनले ४४ बलको इनिङ्समा ११ चौका र दुई छक्का प्रहार गरे ।
अर्का प्रारम्भिक ब्याट्सम्यान रोहित शर्माले ४१ रन बनाए ।
उनीहरूले पहिलो विकेटका लागि ६७ रनको साझेदारी गरेका थिए ।
बलिङतर्फ बसिल थम्पीले सर्वाधिक ३ विकेट लिँदा मुर्गन अश्विनले २ तथा टाइमल मिल्सेल १ विकेट लिए ।
जितसँगै दिल्लीले पहिलो खेलमा २ अंक जोडेको छ । दिल्ली तालिकाको शीर्ष स्थानमा उक्लिएको छ ।
मुम्बईले हारबाट प्रतियोगिताको सुरुआत गरेको छ ।
त्यसअघि शनिबार भएको उद्घाटन खेलमा कोलकत्ता नाइट राइडर्सले चेन्नइ सुपर किङ्ग्समाथि ६ विकेटको जित निकालेको थियो ।
आइपिएलअन्तर्गत आइतबार राति अर्को खेल हुँदै छ । जहाँ, रोयल च्यालेन्जर्स बैङ्ग्लोरले पञ्जाब किङ्ग्ससँग खेलिरहेको छ ।
