साउदी अरेबियाका राजकुमार तथा विदेशमन्त्री फैसल बिन फहरान अल साउद नेपाल आइपुगेका छन् ।
नेपाल आइपुगेका विदेशमन्त्री राजकुमार साउदलाई परराष्ट्र मन्त्रालयका सचिव भरतराज पाैडेलले त्रिभुवन अन्तर्राष्ट्रिय विमानस्थलमा स्वागत गरेका थिए ।
दुई दिने नेपाल भ्रमणका लागि काठमाडाैं आइपुगेका विदेशमन्त्री राजकुमार साउदले नेपालका राष्ट्रपति विद्यादेवी भण्डारी र प्रधानमन्त्री शेरबहादुर देउवासँग शिष्टाचार भेट गर्ने कार्यक्रम रहेकाे छ ।
परराष्ट्र मन्त्रालयका अनुसार विदेशमन्त्री साउदले भाेलि (मङ्गलबार) बिहान १० बजे परराष्ट्रमन्त्री डा. नारायण खड्कासँग द्वपक्षीय भेटवार्ता गर्दै आफ्नाे भ्रमण औपचारिक रुपमा सुरु गर्नेछन् ।
मन्त्री खड्काले विदेशमन्त्री साउदसहितका साउदी प्रतिनिधिमण्डललाई नेपाल सरकारका तर्फबाट दिवा भोजको आयोजना गर्दैछन् ।
राष्ट्रपति र प्रधानमन्त्रीसँगकाे भेटवार्तापछि राजकुमार साउद नेतृत्वकाे साउदी टाेली भोलि नै स्वदेश फिर्ता हुनेछ।
साउदी अरब नेपाली श्रम गन्तव्यको प्रमुख देशका रूपमा गनिन्छ । त्यहाँ चार लाखभन्दा बढी नेपाली नागरिक श्रमका लागि रहेको अनुमान गरिन्छ ।
