आइसिसी टी२० विश्वकप ग्लोबल क्वालिफायरको सेमिफाइनलमा खेलमा यतिबेला नेपाल र युनाइटेड अरब इमिरेट्स (युएई)बीचको खेल भइरहेको छ ।
अल अमेरत क्रिकेट रङ्गशालमा भइरहेको नेपाल र युनाइटेड अरब इमिरेट्स (युएई)बीचको सुरुवाती दश ओभरको खेल सकिँदा युएईले दुई विकेटको क्षतिमा ८४ रन बनाउन सफल भएको छ ।
नेपाललाई खेलको दोस्रो ओभरमा पहिलो सफलता मिलेको थियो ।
जितेन्द्र मुखियाले चिराग सुरीलाई बोल्ड आउट गर्दै पेभिलियन फर्काएका थिए ।
सुरीले पाँच बलको सामना गर्दै चार रन मात्रै जोड्न सफल भए ।
तर सुरी आउट भएसँगै तेस्रो नम्बरमा ब्याटिङ गर्न आएका वृत्य अरिवन्दले भने नेपाली बलरलाई दबाबमा राख्दै उत्कृष्ट पारी खेलेका थिए ।
पाँच चौका र तीन छक्कासहित २३ बलमा ४६ रनको उत्कृष्ट पारी खेलेका उनलाई नेपालका कप्तान सन्दिप लामिछानेले आफ्नो गुग्लीको धरापमा पार्दै क्लिन बोल्ड गर्दै क्रिज छाड्न बाध्य बनाए ।
लामिछानेले खेलको आठौँ ओभरको तेस्रो ओभरमा अरिवन्दले पेभिलियन पठाउँदै युएईलाई ठूलो स्कोर बनाउनबाट रोकेका थिए ।
क्वालिफायरको समूह चरणको पहिलो खेलमा नेपालले ओमानविरुद्ध खेलेको थियो । पहिलो खेलमा ओमानलाई ७८ रनमै समेटेर ३९ रनको जित निकाल्दै विजयी सुरुवात गरेको नेपालले दोस्रो खेलमा फिलिपिन्सलाई एक सय ३६ रनको विशाल अन्तरले हराएको थियो ।
फिलिपिन्सलाई ८२ रनमै समेटेको नेपाल समूह चरणको अन्तिम खेलमा क्यानडालाई आठ विकेटलाई हराउँदै सेमिफाइनल प्रवेश गरेको थियो ।
समूहको शीर्ष स्थानमा रहँदै समूह चरणका खेल सकेको नेपालले अन्तिम खेलमा क्यानडालाई ८० रनमै समेटेको थियो ।
आजको खेलमा नेपाल विजयी भए अस्ट्रेलियामा यहीँ वर्ष आयोजना हुने टी२० विश्वकपमा नेपालले आफ्नो स्थान पक्का गर्नेछ ।
नेपालले पछिल्लो पटक २०१४मा बङ्गलादेशमा सम्पन्न टी२० विश्वकपमा सहभागीता जनाएको थियो ।
२०१४ को विश्वकप नै नेपालको पहिलो र पछिल्लो विश्वकप सहभागीता हो ।
