आईसिसी टी२० विश्वकप ग्लोबल क्वालिफायरको आफ्नो अन्तिम खेलमा नेपालले क्यानडालाई दबाबमा राखेको छ ।
सातौं ओभरसम्म आफ्ना चार खेलाडीलाई गुमाएको क्यानडा पूर्ण दबाबमा खेलिरहेको छ ।
अल अमरेत क्रिकेट रङ्गशालामा भइरहेको खेल नेपालले टस हारेर पहिले फिल्डिङको निम्तो पाएको थियो ।
नेपालले पहिलो सफलता कमलसिंह ऐरीमार्फत पाएको थियो ।
खेलको पहिलो ओभरको पाँचौँ बलमा ऐरीले म्याथ्यु स्पोर्सलाई कुशल भुर्तेलमार्फत क्याच गराएका थिए ।
नेपाललाई दोस्रो सफलता पनि ऐरीले नै दिलाएका थिए ।
खेलको चौथो ओभरको तेस्रो बलमा नवनीत धालीवाललाई १८ रनमा पेभिलियन फर्काएका थिए ।
पाँचौँ ओभरको दोस्रो बलमा नेपालले तेस्रो सफलता पाएको थियो ।
अविनाश बोहराले रायन पठानलाई १४ रनमा क्रिज छाड्न बाध्य बनाएका थिए ।
पठानलाई कमलसिंह ऐरीले रन आउट गरेका थिए ।
सोही ओभरको अन्तिम बलमा रविन्द्रपाल सिंहलाई विकेटकिपर आशिफ शेखमार्फत क्याच आउट गराउँदै बोहराले नै नेपाललाई चौथो सफलता दिलाएका थिए ।
