आईसिसी टी२० विश्वकप ग्लोबल क्वालिफायरको पहिलो खेलमा नेपालले ओमानलाई एक सय १८ रनको लक्ष्य दिएको छ ।
ओमानविरुद्ध मध्यम लक्ष्य प्रस्तुत गर्न नेपालका आरिफ शेखले सर्वाधिक ३८ रन जोडे ।
आफ्ना दुवै ओपनरलाई सस्तैमा गुमाएको नेपालका लागि पाँचौँ नम्बरमा ब्याटिङका लागि आएका शेखले जोगाएका थिए ।
नेपालका चार ब्याटर दोहोरो अङ्कको रन नबनाई नै पेभिलियन फर्किएका थिए ।
नेपालले अन्तिम दुई ओभरमा २५ रन बनाएको थियो ।
१९औं ओभरमा ११ रन बनाएको नेपालले अन्तिम २०औं ओभरमा १५ रन बनाएको थियो ।
ओमानस्थित अल अमरेत क्रिकेट रङ्गशालामा भएको पहिलो खेलमा ओमानले टस जितेर नेपाललाई ब्याटिङको निम्तो दिएको थियो ।
नेपालले पहिलो विकेटका रुपमा आसिफ शेखलाइ गुमाएको थियो । शेख खेलको पहिलो ओभरमा नै क्याच आउट भएका थिए ।
शेखलाई विलाल खानले कवार अलिमार्फत क्याच गराएका थिए ।
पहिलो ओभरको अन्तिम बलमा आफ्नो पहिलो विकेट गुमाएको नेपालले खेलको तेस्रो ओभरमा दोस्रो विकेट गुमाएको थियो ।
नेपालका अर्का ओपनर कुशल भुर्तेल पाँच रन बनाएर पेभिलियन फर्किएका थिए ।
भुर्तेललाई पनि विलाल खानले नै क्याच आउट गराएका थिए ।
भुर्तेलको विकेटका लागि खानलाई अलि नै सहयोग गरे ।
१२ रनमा दुई विकेट गुमाएको नेपालको तेस्रो विकेट सातौं ओभरमा पतन भयो ।
नेपालका ज्ञानेन्द्र मल्ल १५ रन बनाएर बोल्ड आउट भए ।
फयाज बटले मल्लको विकेट लिँदै पेभिलियन पठाएका थिए ।
चौथो विकेटका लागि नेपालले दिपेन्द्रसिंह ऐरीलाई गुमाएको थियो ।
खेलको नवौं ओभरमा ओमानका विकेट किपर नशिम खुशीले स्टम्पिङ आउट गरेका थिए । जिसन मक्सुदको बलमा ऐरीलाई खुशीले पेभिलियनको दिशा दिन सफल भए ।
आउट हुनअघि १८ बलको सामना गरेका ऐरीले एक चौकाको मद्दतमा ११ रनको योगदान दिएका थिए ।
नेपालको पाँचौँ विकेटका रुपमा लोकेश बम क्रिजबाट बिदा भए । उनलाई खवार अलिले क्याच आउट गराएका थिए । अलिले बमलाई कलिमुल्लाहमार्फत क्याच आउट गराए ।
पेभिलियन फर्किन अघि बमले एक छक्काको सहयोगमा नेपालका लागि १७ बलमा १६ रनको योगदान दिए ।
१६औं ओभरको अन्तिम बलमा नेपालले छैटौँ विकेटका रुपमा विवेक यादवलाई गुमायो । यसपटक पनि खवार अलि भाग्यमानी सावित भए । उनले फयाज बटमार्फत यादवलाई क्रिज छाड्न बाध्य बनाए ।
यादवले दश बलमा नेपालका लागि सात रन जोडे ।
तीन बलको सामना गरी मात्र एक रन जोडेर कमलसिंह ऐरी नेपालको सातौ विकेटका रुपमा क्रिजबाट बिदा भए । उनलाई खवार अलिले प्रजापतीमार्फत क्याच आउट गराए ।
नेपाललाई सस्तोमा रोक्न विलाल खानले दुई, फयाज बट र जिसन मक्सुदले समान एक र खवार अलिले सर्वाधिक तीन विकेट लिए ।
