नेपाली राष्ट्रिय फुटबल टोलीका कप्तान किरण चेम्जोङले मोरिससविरुद्धको मैत्रिपूर्ण खेलमा नेपालले जितका लागि खेल्ने बताएका छन् ।
अफ्रिकी राष्ट्र मोरिससविरुद्धको दुई मैत्रिपूर्ण खेलअघि अखिल नेपाल फुटबल सङ्घ (एन्फा)द्वारा आयोजित पत्रकार सम्मेलनमा कप्तान चेम्जोङले मैत्रिपूर्ण भए पनि जितका लागि खेल्ने बताएका हुन् ।
माल्दिभ्सबाट दुई दिनअघि मात्रै राष्ट्रिय टोलीको बन्द प्रशिक्षणमा सहभागी हुन आइपुगेका चेम्जोङले टोलीका सबै खेलाडी मानसिक र शारीरिक रुपमा फिट रहेको बताए ।
दुवै टोलीका सम्पूर्ण खेलाडी ‘ए’ डिभिजन लिगमा खेलिरहेकाले खेलाडीको फिटनेशमा कुनै समस्या नरहेको उनले बताए ।
पत्रकार सम्मेलनमा उपस्थित भएका नेपालका सहायक प्रशिक्षक किरण श्रेष्ठले शारीरिक रुपमा मोरिससका खेलाडी बलियो रहे पनि समग्र टोलीको स्तर भने नेपालको जस्तै रहेको तर्क गरेका छन् ।
मोरिससलाई कसरी लिनुभएको छ भन्ने प्रश्नमा उनले भने, ‘फिजिकल्ली फिट छन् तर नेपाल र मोरिससको स्तर उहीँ हो ।’
दुई टोली बनाएर मोरिससविरुद्ध उतार्नुको मुख्य उद्देश्य धेरे खेलाडीलाई म्याच एक्सपोजर दिनु रहेको समेत प्रशिक्षक श्रेष्ठले बताएका छन् ।
नेपालले माघ १५ र १८ मा मोरिससविरुद्ध दुई मैत्रिपूर्ण खेल खेल्दैछ ।
भोलि (शनिबार) हुने पहिलो मैत्रिपूर्ण खेल दशरथ रङ्गशालामा सवा पाँच बजे सुरु हुँदैछ ।
खेलको कान्तिपुर टेलिभिजनले प्रत्यक्ष प्रसारण गर्नेछ ।
