आगामी नोभेम्बरमा कतारमा हुने विश्वकप फुटबलको छनोट खेलमा अर्जेन्टिनाले चिलीमाथि सङ्घर्णपूर्ण जित निकालेको छ ।
शुक्रबार बिहान भएको विश्वकपको दक्षिण अमेरिकी छनोटतर्फको खेलमा अर्जेन्टिनाले चिलीलाई २–१ गोलले हराएको हो ।
अर्जेन्टिना यसअघि नै विश्वकपमा छनोट भइसकेको छ ।
दोस्रो स्थानमा रहेको अर्जेन्टिनाले १४ खेलमा ३२ अङ्क जोडेको छ ।
चिली भने १६ अङ्कसहित साताैँ स्थानमा छ । उसले १५ खेल खेलेको छ ।
चिलीको कालामा भएको खेलमा अर्जेन्टिनालाई जिताउन एन्जल डी मारिया र लाउटारो मार्टिनेजले एक–एक गोल गरे ।
चिलीका बेन ब्रेरेटन डियाजको गोल सान्त्वना बन्यो ।
खेलको नवौँ मिनेटमा डी मारियाले गोल गर्दै अर्जेन्टिनालाई सुरुआती अग्रता दिलाएका थिए ।
२०औँ मिनेटमा डियाजले गोल गर्दै चिलीलाई खेलमा फर्काए ।
३४औँ मिनेटमा मार्टिनेजले गोल गरेपछि अर्जेन्टिनाले पुनः अग्रता बनायो ।
र, बाँकी समय दुवै टोलीले गोल गर्न नसकेपछि अर्जेन्टिना २–१ गोलले विजयी भएको हो ।
