कतारमा यसै वर्षको नोभेम्बरबाट सुरु हुने विश्वकप फुटबलको छनोट खेलमा ब्राजिलले इक्वेडरसँग अङ्क बाँडेको छ ।
ब्राजिलले दक्षिण अमेरिकी महादेशको छनोटमा शुक्रबार बिहान इक्वेडरसँग १-१ गोलको बराबरी खेल्दै अङ्क बाँडेको हो ।
सुरुआती अग्रता जोगाउन नसक्दा ब्राजिल बराबरीमा रोकिएको हो ।
खेलको छैटाैँ मिनेटमा कासेमिरोले गोल गर्दै ब्राजिललाई सुरुआती अग्रता दिलाएका थिए ।
१५औँ मिनेटमा एलेक्जेन्डर डोमिनगुएज सोझै रातो कार्ड पाएपछि इक्वेडर १० खेलाडीमा सीमित बन्यो ।
त्यसको पाँच मिनेटपछि नै इमेर्सन रोयल दोहोरो पहेँले कार्ड पाएपछि ब्राजिल पनि १० खेलाडीमा समेटियो ।
त्यसपछि खेलमा फर्कन निकै सङ्घर्ष गरेको इक्वेडरले ब्राजिलविरूद्ध दबाब कायमै राख्यो ।
७५औँ मिनेटमा फेलिक्स टोरेसले गोल गर्दै खेललाई बराबरीमा ल्याए ।
त्यसपछि खेलमा दुवैतर्फबाट गोल हुन नसक्दा १-१ को बराबरीमा सकियो ।
त्यसअघि ब्राजिलका गोलरक्षक एलिसन बेकरले दुई पटक रेड कार्ड पाउने अवस्था सिर्जना भएको थियो ।
रेफ्रीले उनलाई दुवै पटक रातो कार्ड देखाए पनि भिडियो असिस्टेन्ट रेफ्री (भिएआर) ले दुवै पटक कार्ड फिर्ता लिएका थिए ।
यो बराबरीसँगै ब्राजिलले १४ खेलबाट ३६ अङ्क जोड्दै तालिकाको शीर्ष स्थानमा कायमै छ ।
ब्राजिल यसअघि नै विश्वकपमा छनोट भइसकेको छ ।
यता, ब्राजिलसँग बराबरी खेलेको इक्वेडरले छनोटको सम्भावना जीवितै राखेको छ।
यो बराबरीसँगै इक्वेडरको १५ खेलबाट २४ अङ्क भएको छ।
यो समूहबाट शीर्ष ४ टोली विश्वकपमा सोझै छनोट हुनेछन् ।
यसअघिनै ब्राजिलसँगै अर्जेन्टिना पनि छनोट भइसकेको छ ।
अब बाँकी दुई टोली सोझै पुग्नेछन् भने पाँचौ टोलीले प्लेअफ खेल्ने छ ।
