२०औं संस्करणको आहा रारा गोल्डकपको अन्तिम क्वाटर फाइनलमा थ्रीस्टारलाई १–० ले पाखा लगाउँदै नेपाल आर्मी फुटबल क्लबले सेमिफाइनलमा आफ्नाे स्थान सुरक्षित गरेकाे छ ।
पोखरा रङ्गशालामा भएकाे खेलकाे पहिलाे हाफ बराबरीमा सकिएकाे थियाे ।
तर दाेस्राे हाफमा राजिव गुरूङ गाेल गर्न सफल भएपछि आर्मीकाे जित सुनिश्चित भयाे ।
खेलकाे आठौं मिनेटमा गाेलरक्षक प्रिसोले थ्रीस्टारको खतरा टारेका थिए । वान भर्सेज वानको स्थितीमा आर्मीका फरवार्ड जर्ज प्रिन्स कार्कीको प्रयासलाई प्रिसोले सुन्दर बचाउ गरेका थिए ।
पहिलो हाफ गोलरहित बराबरीमा सकिएपछि सुरू भएकाे दाेस्राे हाफमा भने दुवै टाेलीले एकअर्काकाे पाेस्टमा धावा बाेलेका थिए ।
खेलकाे ६३औं मिनेटमा आर्मीले फ्रिकिक पाएको थियो । टंक बस्नेतलाई थ्रीस्टारका खेलाडीले पेनाल्टी क्षेत्र नजिकै फाउल गरेको पछि पाएको फ्रिकिकलाई आर्मीका फरवार्ड जर्ज प्रिन्स कार्कीले सशक्त प्रहार गरेका थिए । तर उनको प्रहार प्रिसोले उत्कृष्ट बचाउ गर्दा आर्मी अग्रंता लिनबाट चुकेको थियो ।
६७औं मिनेटमा डोना थापाको प्रहार आर्मीका युद्ध शाहीले ब्लक गरिदिएपछि थ्रीस्टार गोल गर्नबाट वञ्चित भएको थियो ।
दोस्रो हाफको ७०औं मिनेटमा गोल गर्दै राजिव गुरुङले आर्मीलाई अग्रता दिलाएका थिए । घाइते टंक बस्नेतको स्थानमा मैदान आएका गुरुङले मध्यभागबाट जर्ज प्रिन्सले निकालिदिएको पासमा उत्कृष्ट गोल गरेका थिए ।
वान भर्सेज वानमा थ्रीस्टारका गोलरक्षक प्रिन्सो बल बचाउन निकै अगाडि आए पनि गुरुङले सुन्दर प्लेसमेन्ट गर्दै आर्मीलाई १–० को अग्रता दिलाएका थिए ।
आजको विजेताले फाइनल प्रवेशका लागि मनाङ मस्र्याङ्दीसँग खेल्नु पर्नेछ । मनाङसँगै नेपाल एपिएफ क्लब र मछिन्द्र क्लब आहा राराको जारी संस्करणको सेमिफाइनलिस्ट टोली हुन् ।
उपाधि जित्ने क्लबले १० लाख एक हजार र उपविजेता टोलीले पाँच लाख एक हजार नगद पुरस्कारसहित ट्रफि प्राप्त गर्नेछन् ।
