इङ्ग्लिस प्रिमियर लिग फुटबलमा साविक विजेता तथा लिग लिडर म्यानचेस्टर सिटी बराबरीमा रोकिएको छ ।
शनिबार राति साउथह्याम्पटनको मैदानमा दुवै टिमले १-१ गोलको बराबरी खेल्दै बराबरी अङ्क बाँडेका हुन् ।
खेलको सातौँ मिनेटमा केली वाल्कर पिटर्सले गोल गर्दै साउथह्याम्पटनलाई सुरुआती अग्रता दिलाएका थिए । ६५औँ मिनेटमा एमरिक लापोर्टेले गोल गर्दै सिटीलाई हारबाट जोगाएका हुन् ।
यस बराबरीसँगै सिटीको जितको यात्रा टुङ्गिएको छ । यसअघि सिटीले लगातार १२ खेलमा जित निकालेको थियो ।
बराबरीसँगै सिटीले २३ खेलमा ५७ अङ्क जोडेको छ । सिटी दोस्रो स्थानको लिभरपुलभन्दा १२ अङ्कले अघि रहेको छ ।
साउथह्याम्पटन २५ अङ्क जोडेर १२औँ स्थानमा रहेको छ ।
