आइसीसी टी-२० विश्वकप ग्लोबल छनोट खेलअघि नेपालले खेल्न लागेको चार टोली सम्मिलित टी-२० आई सिरिजको खेल तालिका सार्वजनिक भएको छ ।
नेपाल क्रिकेट सङ्घ (क्यान) ले शनिबार नेपाल, ओमान, आयरल्यान्ड र युएईगरी चार देशबीच हुने सिरिजको खेल तालिका सार्वजनिक गरेको हो ।
विश्वकपको ग्लोबल छनोटअन्तर्गत नेपाल र ओमानबीचको खेल फेब्रअरी १८ तारिखमा ओमान क्रिकेट एकेडेमी ग्राउन्डमा हुने भएको छ ।
नेपाल र ओमान आइसीसीको खेलतालिकाअनुसार ग्लोबल छनोटको समूह ‘ए’ अन्तर्गतको ग्रुप टुमा छन् । सो समूहमा क्यानाडा र फिलिपिन्ससमेत छन् ।
नेपालको दोस्रो खेल फिलिपिन्सविरुद्ध अल अमेरात क्रिकेट ग्राउन्डमा फ्रेब्रुअरी १९ मा हुनेछ । नेपालले तेस्रो खेल क्यानाडाविरुद्ध ओमान क्रिकेट एकेडेमी ग्राउन्डमा फेब्रुअरी २१ मा खेल्ने तालिका रहेको छ ।
ग्रुप वानमा भने युएई, बहराईन, आयरल्यान्ड र जर्मनी रहेका छन् । समूह चरणको खेलपछि शीर्ष दुई टोली दुवैसमूहबाट सेमिफाइनलमा प्रवेश गर्नेछन् ।
सेमिफाइनल खेलहरु फेब्रुअरी २२ तारिखमा हुनेछ भने फाइनल भने फेब्रुअरी २४ तारिखमा ओमान क्रिकेट एकेडेमी ग्राउन्डमा हुनेछ ।
फाइनल प्रवेश गर्ने दुवै टोली अस्ट्रेलियामा अक्टोबर १६ देखि नोभेम्बर १३ तारिखसम्म हुने आइसीसी पुरुष टी–ट्वान्टी विश्वकपको लागि छनोट हुनेछन् ।
