नेपाल पुलिस क्लब पोखरामा जारी २०औँ संस्करणको आहा रारा गोल्डकप फुटबल प्रतियोगिताको क्वार्टरफाइनलमा प्रवेश गरेको छ ।
शुक्रबार भएको खेलमा हिमालयन शेर्पा क्लबलाई सडन डेथमा ७-६ गोलले हराउँदै पाचौँ पटकको विजेता पुलिस क्वार्टरफाइनलमा पुगेको हो ।
पोखरा रङ्गशालामा पहिलो हाफमा बराबरी रहेको खेलमा ५३औँ मिनेटमा निलकुमार राईको गोलबाट पुलिसले अग्रता लिएको थियो ।
त्यसको ६ मिनेटमै हिमालय शेर्पाका विश्वास श्रेष्ठले बराबरी गरे । निर्धारित समयको खेल बराबरीमा सकिएपछि ३० मिनेट समय थप गरिएको थियो । थप समयमा पनि गोल हुन नसकेपछि खेल पेनाल्टीमा धकेलिएको थियो ।
पेनाल्टीमा पुलिसका तीर्थ राना मगर, निरकुमार राई, सुमन सुवेदी र भोला सिलवालले गोल गरे । पुलिसका कपिल ढकालले बाहिर प्रहार गरे ।
हिमालयनका त्रिदेभ गुरुङ, आशिष गुरुङ, पिस्तोल मुतुम्बा र विश्वास श्रेष्ठले गोल गरे ।
तर पेनाल्टीमा शेर्पाका उलरिच सिवेको बल बारमाथि बाट बाहिरिएको थियो भने पुलिसका कपिल ढकालको बल बारमा ठोक्किएर फर्किएको थियो ।
पेनाल्टीमा समेत बराबरी भएपछि खेलको टुङ्गो सडन डेथमार्फत् लगाउन परेको थियो। सडेन डेथमा ७–६ गोल अन्तरले विजयी हुँदै पुलिस दोस्रो चरणमा प्रवेश गरेको हो । अब पुलिसले अन्तिम आठमा मनाङ मर्स्याङ्दी क्लबसँग खेल्नेछ ।
