प्रधानमन्त्री शेरबहादुर देउवाले देशमा कुनै पनि अत्यावश्यक वस्तुको अभाव नभएको दाबी गरेका छन् । शुक्रबार (आज) राष्ट्रका नाममा सम्बोधन गर्दै देउवाले अत्यावश्यक वस्तुको अभाव नभएको दाबी गरे ।
उनले भने, ‘सरकारको नेतृत्व गरेपछि आर्थिक समाजिक रूपान्तरणमा जोड दिएको छु । उत्पादनमुखी अर्थतन्त्रलाई जोड दिएको छु । आपूर्ति व्यवस्था सुधार गरी महँगी नियन्त्रणमा गरेको छु। भ्रष्टाचार नियन्त्रणमा काम भएका छन् । अत्यावश्यक वस्तुको कुनै अभाव छैन ।’
यस्तै, देउवाले प्रमुख प्रतिपक्षी दल नेकपा एमालेसँग संवाद गरेर संसदको गतिरोध अन्त्य गरिने बताए । ‘संसदमा रहेका सबै राजनीतिक दलहरूसँग संवाद गरेर गतिरोध अन्त्य गरिने छ,’ प्रधानमन्त्री देउवाले भने।
कोभिड नियन्त्रणका लागि खोप नै प्रभावकारी माध्यम भएको भन्दै देउवाले चैतसम्म सबैलाई खोप लगाइसक्ने उद्देश्य अनुसार खोप वितरण भइरहेको जानकारी दिए । उनले आफ्नो सरकारको उपलब्धिका रुपमा ६५ प्रतिशतलाई पूर्ण मात्राको खोप लगाउने भएको समेत बताए ।
