अस्ट्रेलियामा हुने आइसिसी पुरुष टी–ट्वान्टी विश्वकपको पहिलो खेलमा श्रीलङ्का र नामिवियाले खेल्ने भएका छन् ।
आइसिसीले शुक्रबार सार्वजनिक गरेको तालिकाअनुसार उद्घाटन खेलमा श्रीलङ्का र नामिवियाले खेल्ने निश्चित भएको हो ।
पहिलो चरणअन्तर्गत श्रीलङ्का र नामिवियाबीचको खेल अक्टोबर १६ मा अस्ट्रेलियाको गिलोङस्थित कार्डिनिया पार्क स्टेडियममा हुनेछ । पहिलो चरणको समूह ‘ए’ अन्तर्गत नामिविया र श्रीलंकासहित ग्लोबल छनोटबाट आउने दुई टिम रहनेछन् ।
त्यसैगरी, समूह ‘बी’ अन्तर्गत स्कटल्यान्ड र वेस्टइन्डिजसहित ग्लोबल छनोटबाट आउने दुई टिम हुनेछन् । ग्लोबल छनोट ओमान र जिम्बाबेमा हुनेछ । यी दुई प्रतियोगिताबाट चार टोलीले विश्वकपको यात्रा तय गर्नेछन् ।
प्रतियोगिताको सुपर १२ को खेलहरू अक्टोबर २२ बाट सुरु हुनेछन् । सुपर १२ को पहिलो खेलमा घरेलु राष्ट्र तथा साविक विजेता अस्ट्रेलियाले साविक उपविजेता न्युजिल्यान्डसँग खेल्ने छ ।
सुपर १२ अन्तर्गत भारत र पाकिस्तान एउटै समूहमा परेका छन् । भारत, पाकिस्तान, बङ्गलादेश, दक्षिण अफ्रिका र पहिलो समूहबाट आउने दुई टोली समूह २ मा हुनेछन् ।
समूह दुईअन्तर्गतको पहिलो खेल भारत र पाकिस्तानबीच मेलवर्न क्रिकेट ग्राउन्डमा अक्टुबर २३ तारिखमा हुनेछ । यस्तै, समूह एकमा अफगानिस्तान, अस्ट्रेलिया, इङ्ग्ल्यान्ड र न्युजिल्यान्डसहित पहिलो चरणबाट आउने दुई टोली रहनेछन् ।
प्रतियोगिताको पहिलो सेमिफाइनल नोभेम्बर ९ मा र दोस्रो सेमिफाइनल नोभेम्बर १० मा हुनेछ । नोभेम्बर १३ मा मेलवर्न क्रिकेट ग्राउन्डमा फाइनल हुनेछ ।
