साउदी अरबले नेपालको फुटबल विकासका लागि सहयोग गर्ने भएको छ ।
अखिल नेपाल फुटबल सङ्घ (एन्फा) का अध्यक्ष कर्माछिरिङ शेर्पा र साउदी अरब फुटबल फेडेरेसन (साफ) का अध्यक्ष यासेर अलमिसेहालले आइतबार नेपाली फुटबलको विभिन्न पक्षमा सहयोगसम्बन्धी सम्झौतापत्रमा हस्ताक्षर गरे ।
सम्झौताअनुसार साउदी अरवले दुई वर्षसम्म नेपाली फुटबलमा सहयोग गर्नेछ ।
सम्झौतामा दुवै देशले फुटबल गतिविधिका लागि एक अर्कालाई आतिथ्य प्रदान गर्ने, दुई देशबीच अन्तर्राष्ट्रिय मैत्रीपूर्ण खेल आयोजना र विभिन्न उमेर समूह यू–१७, यू–२० र यू–२३ को प्रशिक्षणमा सहयोग आदानप्रदानमा सहयोग हुने जनाइएको छ ।
यस्तै, रेफ्री प्रशिक्षण, भिएआर प्रणाली, युवा फुटबल विकासका लागि विभिन्न कार्यशाला, बैठक र सेमिनारलगायत कार्यक्रममा सहयोग हुने उल्लेख छ ।
एन्फा अध्यक्ष शेर्पा हाल साउदी अरबको भ्रमणमा छन् ।
शेर्पाले साउदीमा नेपाली फुटबलको विकासका लागि एसियाली फुटब महासङ्घ (एएफसी) का महासचिव दातो विन्डसर जोन र सहमहासचिव वाहिद कर्दनीसँग पनि भेटवार्ता गरेको एन्फाले जनाएको छ ।
