दोस्रो हाफमा उत्कृष्ट खेल प्रदर्शन गर्दै जारी ए डिभिजन लिगमा मछिन्द्रले बिग्रेड ब्वाइजविरुद्ध ४–० को सानदार जित निकालेको छ ।
खेलको पहिलो हाफमा गोलरहित बराबरी खेले पनि मछिन्द्रका लागि दोस्रो हाफमा विमल घर्ती मगर नायक बने । मछिन्द्रका लागि विमल दुई गोल र एक असिस्ट गर्न सफल भए ।
दोस्रो हाफको ५६औं मिनेटमा विमलको गोलमार्फत मछिन्द्रले अग्रता लिएको थियो । राइट फ्ल्याङ्कबाट छिरिङ गुरुङले निकालिदिएको पासमा रेजिन सुब्बाले एग्रोब्याटिक प्रयास गरे पनि असफल भएपछि विमल घर्ती मगरले हेडरमार्फत गोल गरे ।
पहिलो गोल गर्दै हौसिएको मछिन्द्रले त्यसको पाँच मिनेटपछि नै अग्रता दोब्बर बनाएको थियो । खेलको ६१औं मिनेटमा मगरले नै गोल गर्दै मछिन्द्रलाई बलियो स्थितीमा पुर्याए ।
देवेन्द्र तामाङले आफ्नो हाफबाट गरेको लङ रेन्जर पासमा बिग्रेडका डिफेन्डर इबोडेले गल्ति गरेपछि त्यसको फाइदा उठाउँदै मगरले वान भर्सेज वानमा उत्कृष्ट गोल गरे ।
मछिन्द्रका लागि तेस्रो गोल भने रेजिन सुब्बाको नाममा रह्यो । विमल घर्ती मगरले राइट फ्ल्याङ्कबाट मिलाइदिएको पासमा सुब्बा ८३औंमा मिनेटमा गोल गर्न सफल भए ।
कतारमा उपचार गरेर फर्किएपछि खेलेको लिगको पहिलो खेलमा नै सुब्बा मछिन्द्रका लागि गोल गर्न सफल रहे ।
अतिरिक्त समयको दोस्रो मिनेटमा अभिषेक रिजाल गोल गर्न सफल भएसँगै मछिन्द्र फराकिलो जित निकाल्न सफल भयो । रिजालको गोलका लागि मछिन्द्रका कप्तान सुजल श्रेष्ठले पास मिलाइदिएका थिए ।
आजको जितसँगै मछिन्द्र २३ अङ्कको साथ शीर्ष स्थानमा यथावत् छ । उसले दोस्रो स्थानको मनाङविरुद्ध चार अङ्कको स्पष्ट अग्रता लिएको छ ।
यता मछिन्द्रविरुद्ध हार भोगको बिग्रेड ब्वाइज भने ६ अङ्कका साथ रेलिगेशन जोनभन्दा ठिक माथि अर्थात १२औं स्थानमा छ ।
आज हुने भनिएको दोस्रो खेल भने कोरोनाको कारण स्थगित भएको छ । च्यासलका १९ खेलाडीमा कोभिड संक्रमण देखिएपछि नेपाल पुलिस र च्यासलको खेल अखिल नेपाल फुटबल संघ (एन्फा) ले स्थगित गरेको बताएको छ ।
