प्रधानमन्त्री शेरबहादुर देउवाले ब्याडमिन्टन खेलाडी प्रिन्स दाहाललाई बधाई दिएका छन् । बिहीबार सामाजिक सञ्जाल ट्विटरमार्फत देउवाले विश्व ब्याडमिन्टनको वरीयतामा शीर्षस्थान कब्जा गरेका युवा खेलाडी प्रिन्सलाई बधाई दिएका हुन् ।
‘विश्व ब्याडमिन्टन महासङ्घले जारी गरेको पुरुष जुनियरतर्फको विश्व वरीयतामा शीर्षस्थान हासिल गर्न सफल हुनुभएकोमा १९ वर्षीय प्रिन्स दाहाललाई हार्दिक बधाई तथा आगामी दिनको लागि शुभकामना व्यक्त गर्दछु’, प्रधानमन्त्री देउवाले ट्विटमा लेखेका छन् ।
यस्तै, प्रिन्सलाई राष्ट्रिय खेलकुद परिषद् (राखेप) ले समेत बधाई दिएको छ । ब्याडमिन्टन वर्ल्ड फेडेरेसन (बिडब्लुएफ) ले मङ्गलबार (जनवरी ११) सार्वजनिक गरेको विश्व वरीयताको जुनियरतर्फ नेपालका दाहाल शीर्षस्थानमा रहेका छन् ।
दोस्रो स्थानको जस्टिन होलाई आठ सय १० अङ्कले पछि पार्दै दाहाल शीर्षस्थानमा उक्लिएका हुन् । पहिलो पटक शीर्षस्थानमा पुग्न सफल दाहालको १० हजार चार सय अङ्क रहेको छ । उनीभन्दा पछि रहँदै दोस्रो स्थानमा रहेका मलेसियाको होको नौ हजार ५ सय ९० अङ्क रहेको छ ।
विश्व ब्याडमिन्टनमा नेपालले जुनियर र अन्य वरीयतामा पाएको यो सबैभन्दा ठूलो वरीयता हो । विपक्षीविरुद्ध कडा रुपमा उत्रिने दाहालको पछिल्लो समयको प्रदर्शन निकै लोभलाग्दो रहँदै आएको छ ।
