स्याङ्जामा चक्कु प्रहारबाट १६ महिने बालकको मृत्यु भएको छ भने ५ वर्षीया बालिका घाइते भएकी छन् ।
पर्वतको पैंयू गाउँपालिका ५ घर भई हाल वालिङ १० भकुन्डेमा डेरा गरी बस्ने ३३ वर्षीय जितेन्द्र गुरुङले सोही घरमा डेरा गरी बस्ने १६ महिने बालक र ५ वर्षीया बालिकालाई चक्कु प्रहार गरेको प्रहरीले जनाएको छ ।
जिल्ला प्रहरी कार्यालय स्याङ्जाका प्रहरी नायव उपरीक्षक राजेन्द्रप्रसाद अधिकारीका अनुसार जितेन्द्रले वालिङ १२ सिर्सीकोट घर भई हाल भकुन्डे डेरा गरी बस्ने रनमाया गुरुङका १६ महिने छोरा र पाँच वर्षीया छोरीलाई चक्कु प्रहार गरेकाथिए ।
बालकको घाँटीमा चक्कु प्रहारपश्चात् तत्काल उपचारको लागि वालिङ प्राथमिक अस्पतालमा ल्याइएकोमा दिउँसो पौने ४ बजे डाक्टरले मृत घोषणा गरेका थिए ।
यस्तै, मृतक साइमकी दिदी साइना गुरुङको घाइते भएकी छन् । साइनाको घाँटीअगाडि, बायाँ हातको बूढी औँलामा चोट लागेको छ । घटनामा संलग्न जितेन्द्रलाई नियन्त्रणमा लिई थप अनुसन्धान भइरहेको प्रनाउ अधिकारीले जानकारी दिए ।
