स्पेनिस सुपर कप अन्तर्गतको सेमिफाइनलमा आज बार्सिलोना र रियल मड्रिड रियादमा भिड्दैछन् ।
राति सवा १ बजे सुरु हुने खेल बार्सिलोनाका पूर्व खेलाडी एवम् वर्तमान प्रशिक्षक जाभी हर्नान्डेजका कारण पनि विशेष हुनेछ । आजको खेल विशेष हुनुमा मुख्यतः दुई कारण छन् ।
पहिलो प्रशिक्षकका रुपमा जाभीको पहिलो एलक्लासिको हुनेछ । जाभीको एलक्लासिकोको नतिजाले उनलाई रियलविरुद्ध बलियो स्थितीमा देखाउँछ । बार्सिलोनामा रहँदा ४२ एलक्लासिको खेलेका जाभीले १७ जित, १२ बराबरी र १३ हार व्यहोरेका छन् ।
दोस्रो, आज हुने एलक्लासिको उत्कृष्ट मिडफिल्डरबीचको युद्ध हुनेछ । एकताका बार्सिलोनाका वर्तमान प्रशिक्षक जाभी, आन्द्रेस् इनियस्टा र सर्जियो बुस्केट्सको मिडफिल्ड ट्रायोले संसार हल्लाएको थियो । तर यसपटकको कथा भने केही फरक छ ।
जाभी सन्यास लिएर प्रशिक्षकको रुपमा आफूलाई अब्बल बनाउन प्रयासरत रहँदा इनियस्टा पनि सन्यास लिएर चीन लागे । मिडफिल्डका दुई सशक्त खेलाडी गुमाएको बार्सिलोनामा एक्लिएका बुस्केट्सले त्यसयता जाभी र इनियस्टाजस्ता उत्कृष्ट खेलाडीको साथ पाउन सकिरहेका छैनन् ।
बार्सिलोनामा वियोगान्त कथा चलिरहँदा यता रियलकाे मिडफिल्ड दिनानुदिन बलियो बन्दै गइरहेको थियो । लुका मोड्रिच, टोनी क्रुज र कासमिरोसम्मेलित मिडफिल्ड ट्रायोले ला लिगाका र युरोपियन च्याम्पियन्स लिगमा आफूलाई स्थापित गर्न प्रयास गरिरह्याे र सफल भयाे ।
आजको खेलमा यिनै कथालाई हामी एकै रङ्गमञ्चमा देख्दै छौँ ।
बार्सिलोनाका चर्चित मिडफिल्ड मायस्ट्रोले आफ्नो पूरानो साथी सम्मेलित क्लबलाई टचलाइनबाट निर्देशन दिइरहँदा कुनैबेलाको चर्चित मिडफिल्ड ट्रायोको पदचाप पछ्याउँदै आफूलाई उत्कृष्ट साबित गराइसकेका रियलका ट्रायो उनको योजना असफल बनाउन प्रयासरत हुनेछन् ।
