सरकारले देशभरिका विद्यालय माघ १५ गतेसम्म बन्द गर्ने निर्णय गरेको छ ।
कोभिड-१९ सङ्क्रमण तीव्र रूपमा बढ्न थालेपछि कोभिड-१९ सङ्कट व्यवस्थापन समन्वय केन्द्र (सिसिएमसी)को आइतबार बसेको बैठकले माघ १५ गतेसम्म विद्यालय बन्द गर्ने निर्णय गरेको हो ।
सिसिएमसी प्रवक्ता सुनिता नेपालका अनुसार नेपालमा कोरोनाको नयाँ भेरियन्ट ओमिक्रोनसहित तेस्रो लहर आउने जोखिम बढिरहेका बेला सुरुमा कम्तीमा १५ दिन विद्यालय बन्द गर्ने गरी निर्णय भएको हो ।
अझै पनि नागरिकलाई खोप पुग्न नसकेको र धेरै ठाउँमा विद्यार्थीहरूलाई नै खोप लगाउन नसकिएको अवस्थामा कोरोना सङ्क्रमणबाट जोगिनका लागि माघ १५ सम्म विद्यालय बन्द गर्ने निर्णय गरेको प्रवक्ता नेपालले बताइन् ।
त्यसअघि प्रधानमन्त्रीसमेतको सहभागितामा बसेको सिसिएमसीको बैठकले कोरोना सङ्क्रमण रोक्न सम्बन्धित निकायलाई निर्देशन दिएको थियो । त्यस्तै, कोरोनाविरुद्धको खोप अभियानलाई तीव्र पार्नसमेत निर्देशन दिइएको थियो ।
