बार्सिलोनाका ब्राजिलियन मिडफिल्डर फिलिपे कौटिन्हो इंग्लिस प्रिमियर लिग फर्कन सक्ने भएका छन् ।
लिभरपुलबाट स्पेनिस क्लब बार्सिलोना आएयता आफूलाई अब्बल साबित गर्न प्रयासरत कौटिन्होलाई भित्र्याउन नाम चलेका इंग्लिस क्लब लागि परिरहेका छन् । तीमध्ये एस्टन भिल्ला सबैभन्दा अब्बल दाबेदारका रुपमा प्रस्तुत भएको छ ।
स्पेनिस खेल पत्रिका मार्काका अनुसार एस्टन भिल्लाले लोनमा कौटिन्हो भित्र्याउन बार्सिलोनासँग कुराकानी अघि बढाइसकेको छ ।
यस सिजन बार्सिलोनाको जर्सिमा १६ खेल खेलिसकेका कौटिन्हो अधिकाशं समय बेन्चबाट मैदान प्रवेश गरिरहेका छन् । सुरुवाती ११ मा पर्न निकै सकस परिरहेको कौटिन्हो धेरै समय खेलेर आउँदो कतार विश्वकपमा ब्राजिलको टोलीमा पर्न चाहन्छन् ।
बार्सिलोनाका वर्तमान मुख्य प्रशिक्षक जाभी हर्नान्डेज पनि कौटिन्होको प्रदर्शनलाई लिएर सन्तुष्ट हुन सकिरहेका छैनन् । त्यसैले जाभी पनि उनलाई जसरी भए पनि क्लबबाट हटाउने मनासयमा पुगेका छन् ।
कौटिन्होलाई बिक्री गर्नु वा लोनमा कुनै क्लबमा पठाउन यदि बार्सिलोना सफल भयो भने भर्खरै क्लबमा भित्र्याएको फेरान टोरेस र क्लबमा आउने नयाँ खेलाडीलाई ला लिगामा दर्ता गर्न बार्सिलोना सफल हुनेछ ।
एस्टन भिल्लाका प्रशिक्षक स्टेभन जेरार्ड र कौटिन्होले कुनै बेला लिभरपुलको जर्सिमा सँगै खेलेका थिए । जेरार्ड कौटिन्होको खेल कौशलको ठूलो प्रशसंक हुन् त्यसैले पनि उनी २९ वर्षीय ब्राजिलियनलाई आफ्नो टोलीमा भित्र्याउन लागि परेका छन् ।
