चितवनका प्रमुख जिल्ला अधिकारी अस्मान तामाङ लचिलो बनेसँगै माछा व्यावसायीसँग भएको विवाद समाधान भएको छ ।
बिहीबार भरतपुर महानगर प्रमुख रेणु दाहाल, प्रमुख प्रशासकीय अधिकृत, मत्स्य व्यावसायी सङ्घका केन्द्री अध्यक्ष, जिल्ला अध्यक्षलगायतको बैठकले सहमति गरेर विवाद समाधान गरेको हो ।
सिडिओले गल्ती स्वीकारेसँगै समस्या समाधान भएको हो । सिडिओले गल्ती स्वीकार गरी आत्मालोचना गरेपछि सिडिओ तामाङ र मत्स्य व्यावसायीबीच ६ बुँदे सहमति भएको छ ।
नेपाल मत्स्य व्यावसायी सङ्घ चितवनका अध्यक्ष खगेन्द्र सुवेदीले सङ्घ, जिल्ला प्रशासन र महानगरबीच आपसी समन्वय, समझदारी तथा सहकार्य गरी अघि बढ्ने निर्णय भएको बताउँदै विवाद निरूपण भएको जानकारी दिए ।
पुस १८ गते पत्नीले पाँच केजी तीन सय ग्राम माछा महँगोमा किनेको भन्दै सिडिओले भरतपुर रिजाल चोकस्थित चितवन फिस हाउस पुगेर माछा व्यावसायीलाई गाली गलौच गरेको आरोप लाग्दै आएको थियो ।
७ गते पोखरीबाट जलकपुर माछालाई दुई सय ४० रुपैयाँमा माछा किनेकी सिडिओकी पत्नीले १८ गते दिउँसो तीन सय रुपैयाँमा किन्नुपरेपछि सिडिओले आफू ठगिएको भन्दै मुद्दा चलाउने बताउँदै आएका थिए ।
पाँच वर्ष सिडिओ बनेको तर पहिलो पटक विवादमा परेको भन्दै उनले बैठकमा स्वदेशी उत्पादन प्रवर्द्धधन गर्न तयार रहेको जनाउँदै विवाद अगाडि बढाउन नचाहेको बताएको व्यावसायीको भनाइ छ ।
दुई घण्टा भएको छलफलमा भरतपुर मेयर दाहाल, सिडिओ तामाङ, नेपाल मत्स्य व्यावसायी सङ्घका केन्द्रीय अध्यक्ष अम्बिकाप्रसाद अधिकारी, जिल्ला अध्यक्ष सुवेदी, उपाध्यक्ष लुलाराज तामाङ, जिल्ला सचिव नेत्र आले, सङ्घका महानगर सल्लाहकार नारायण शर्मा विपीन, महानगरका प्रमुख प्रशासकीय अधिकृत रामबन्धु सुवेदी सहभागी थिए ।
