लन्डन क्लब चेल्सीले इंग्लिस फुटबल लिग (इएफएल) कप अर्थात कारवाओ कपको सेमिफाइनलको पहिलो लेगमा टोटेनहम हटस्परलाई पराजित गरेको छ । बुधबार राति भएको सेमिफाइनलको पहिलो लेगमा चेल्सीले टोटनहममाथि २–० गोलको जित निकालेको हो ।
घरेलु मैदान स्टाम्फोर्ड ब्रिजमा चेल्सीलाई जिताउन काइ हाभर्ट्जले एक गोल गरे । चेल्सीले एउटा आत्मघाती गोल उपहारमा पाएको थियो ।
खेलको पाँचौँ मिनेटमा हाभर्ट्जले गोल गर्दै चेल्सीलाई सुरुआती अग्रता दिलाएका थिए । ३४औँ मिनेटमा बेन डेभिजले आत्मघाती गोल गरेपछि चेल्सीले २–० गोलको जित निकालेको हो ।
जितसँगै चेल्सीले सेमिफाइनलको पहिलो लेगमा अग्रता बनाएको छ । अब, दोस्रो लेगको खेल १२ जनवरीमा टोटनह्यामको मैदानमा हुनेछ । यस खेलमा यही नतिजा कायम राख्न सके चेल्सी फाइनलमा पुग्नेछ । टोटेनहमलाई कम्तिमा पनि ३–० को जित आवश्यक छ । २–० को जितले खेल अतिरिक्त समय हुँदै ट्राइब्रेकरमा लम्बिन सक्नेछ ।
दुवै लेगको विजेता टिमले आर्सनल र लिभरपुलबीचको विजेता टिमसँग उपाधिका लागि खेल्ने छ । कारबाओ कपको फाइनल २७ फेब्रुअरीमा हुनेछ ।
कोभिडका कारण लिभरपुल र आर्सनलबीचको खेल स्थगित हुन पुग्दा खेल तालिका प्रभावित बनेको छ । पहिलो लेग १३ जनवरीमा तथा दोस्रो लेग २० जनवरीमा हुनेछ ।
