नेपाली राष्ट्रिय क्रिकेट टोलीका सदस्य तथा पूर्वकप्तान ज्ञानेन्द्र मल्लले आफू सधैँभरि कप्तान बन्नका लागि नआएको बताएका छन् । मङ्गलबार बिहान ट्वान्टी–२० विश्वकप छनोटको प्रशिक्षणका लागि कीर्तपुरस्थित टियु मैदानमा पुगेका मल्लले पत्रकारहरूसँगको कुराकानीमा आफूले देशका लागि खेल्ने बताए ।
उनले नेपाल क्रिकेट सङ्घ (क्यान) र खेलाडीबीच केही कुरामा असन्तुष्टि देखिए पनि विवाद भनेर चित्रित गरिएको बताउँदै अब सबै खेलाडी विश्वकप छनोटमा केन्द्रित हुने पनि बताए । मल्लले भने ‘वर्षौँदेखि खेल्दै आएको खेलाडीलाई अकस्मात बिनाकारण विवादमा आउँदा स्वाभाविक रूपमा आत्मसमानमा असर पर्छ । तर जीवनमा मुभ हुनु पर्छ। सधैँका लागि कप्तान हुन आएको पनि होइन, त्यसैले देशका लागि, मेरो लागि र परिवारका लागि खेल्छु।’
‘हामी एकअर्काबीच दुस्मनी छैन’, उनले थपे, ‘१०-१२ वर्षदेखि हामी सबै सँगै खेलिरहेका छौँ कसैसँग मनमुटाव भएको होइन । बोर्ड र खेलाडीसँग पहिले नै यसरी छलफल भएको भए यत्रो दिन यस्तो अवस्था आउँथेन । वर्गीकरण गर्दा हामीलाई जानकारी गराइएको थिएन । त्यसैले अलिअलि असन्तुष्टि पैदा भएको हो ।’
त्यस्तै क्यानसँग खेलाडीहरूको प्रोत्साहन भत्ता बढाउने र ४ जना खेलाडीलाई गरिएको कारबाही फिर्ता लिने सहमति भएको पनि मल्लले जानकारी दिए ।
