म्यानचेस्टर युनाइटेडले इङ्ग्लिस प्रिमियर लिगमा उल्भ्ससँग हार बहोरेको छ । सोमबार राति युनाइटेड उल्भ्ससँग १–० गोलले स्तब्ध भएको हो ।
ओल्ड ट्राफोर्डमा उल्भ्सलाई जिताउन जोआओ माउटिन्होले निर्णायक गोल गरेका थिए । खेलको ८२औँ मिनेटमा माउटिन्होले गोल गर्दै पाहुना टिमलाई महत्त्वपूर्ण अङ्क दिलाए ।
यससँगै युनाइटेडले ४२ वर्षपछि उल्भ्ससँग घरेलु मैदानमा पराजित भएको छ । यसअघि उसले सन् १९८० मा उल्भ्ससँग ओल्ड ट्राफोर्डमा हार बेहोरेको थियो ।
यस्तै, युनाइटेडका अन्तरिम प्रशिक्षकको रूपमा राल्फ रङ्गनिकको अपराजित यात्रामा समेत पूर्णविराम लागेको छ ।
खेलमा उल्भ्सका गोलकिपर जोसे साले इन्जुरी समयमा उत्कृष्ट बचाउ गरेका थिए । ब्रुनो फर्नान्डेजको फ्रि–किकलाई उनले उत्कृष्ट ढङ्गले बचाउ गरेका थिए ।
जितसँगै उल्भ्स आठौँ स्थानमा उक्लिएको छ । उसले १९ खेलमा २८ अङ्क जोडेको छ । युनाइटेड भने ३१ अङ्कका साथ सातौँ स्थानमा छ । युनाइटेड शीर्ष स्थानमा म्यानचेस्टर सिटीभन्दा २२ अङ्कले पछि परेको छ ।
