सहिद स्मारक ‘ए’ डिभिजन लिग फुटबलमा आज एक खेल हुँदै छ । यो एक खेलबाट नेपालको प्रतिनिधित्व गर्दै एएफसी कप छनोट खेल्ने टोलीको टुङ्गो लाग्नेछ ।
छनोटको दौडमा अहिले सहिद स्मारक ए डिजिभन लिगको शीर्ष टोली मनाङ मर्स्याङ्दी क्लब र दोस्रो स्थानको मछिन्द्र फुटबल क्लबमात्र छन् । एएफसी कप छनोट खेल्न पाउने एएफसी क्लब लाइसेन्सप्राप्त चार नेपाली क्लबमध्ये त्रिभुवन आर्मी फुटबल क्लब र एपिएफ फुटबल क्लब भने यसअघि नै छनोटको दौडबाट बाहिरिसकेका छन् ।
आज हुने मछिन्द्र र पुलिसको खेलबाट एएफसी कप खेल्ने टिमको तय हुँदै छ । त्रिपुरेश्वरस्थित दशरथ रङ्गशालामा मछिन्द्रले विभागीय टोली नेपाल पुलिस क्लबको सामना गर्ने छ । पुलिस र मछिन्द्रबीचको खेल अपराह्न ४:४५ बजे हुनेछ ।
मछिन्द्र हाल ६ खेलमा १४ अङ्क जोडेर दोस्रो स्थानमा छ । पुलिस भने ६ खेलमा ६ अङ्क जोडेर १०औँ स्थानमा छ । यस खेलमा मछिन्द्र जित्नैपर्ने दबाबमा छ । यस खेलमा जित निकालेमा मछिन्द्र शीर्ष स्थानमा उक्लने छ र उसले एएफसी कप छनोट खेल्न पाउने छ ।
तर मछिन्द्रले पुलिसविरुद्ध हार वा बराबरी खेलेमा मनाङ मर्स्याङ्दी एएफसी कपका लागि छनोट हुनेछ । मनाङ सात खेलमा १६ अङ्क जोडेर शीर्ष स्थानमा छ । एएफसी कप छनोट खेल्न सातौँ चरणको खेल सकिँदा शीर्ष स्थानमा उक्लनु पर्नेछ ।
