अमेरिकामा सन् २०२६ को मध्यावधि निर्वाचनको मतगणना जारी रहँदा डेमोक्र्याटिक पार्टीले प्रतिनिधि सभा र सिनेट दुवैतर्फ अग्रता बनाएको छ । प्रारम्भिक नतिजाले डेमोक्र्याटलाई उत्साहजनक सुरुवात दिलाएको छ ।
एसोसिएटेड प्रेस (एपी) का अनुसार प्रतिनिधि सभाका कुल ४३५ सिटमध्ये १३२ सिटको नतिजा सार्वजनिक हुँदा डेमोक्र्याटले ८५ सिट जितेका छन् भने थप १११ सिटमा अग्रता लिएका छन् । रिपब्लिकनले ४७ सिट जित्दा ७४ सिटमा अगाडि छन् । प्रतिनिधि सभामा बहुमतका लागि २१८ सिट आवश्यक पर्छ ।
सिनेटतर्फ उत्तरी क्यारोलिनामा डेमोक्र्याटिक उम्मेदवार रोय कूपरले रिपब्लिकन उम्मेदवार माइकल व्हाटलीलाई पराजित गरेका छन् । यस्तै, जर्जियामा जोन ओसफ पुनः निर्वाचित भएका छन् भने न्यु ह्याम्पसायरमा क्रिस पप्पास विजयी भएका छन् ।
जर्जियाको गभर्नर पदमा पनि डेमोक्र्याटिक उम्मेदवार किएशा लान्स बटम्स निर्वाचित भएकी छन् । यससँगै उनी अमेरिकाको पहिलो अश्वेत महिला गभर्नर बनेकी छन् । यता, फ्लोरिडामा भने रिपब्लिकनले सिनेट र गभर्नर दुवै पद आफ्नो नियन्त्रणमा राखेका छन् ।
सिनेटमा बहुमत कायम गर्न ५१ सिट आवश्यक छ । हाल रिपब्लिकनसँग ५३ र डेमोक्र्याटसँग ४५ सिट रहेकाले सदनको नियन्त्रणका लागि प्रतिस्पर्धा तीव्र बनेको छ । यसपटक चुनाव भएका ३५ सिनेट सिटमध्ये डेमोक्र्याटले ११ सिट जितेर थप ७ सिटमा अग्रता लिएका छन् भने रिपब्लिकनले ५ सिट जित्दै ६ सिटमा अग्रता कायम गरेका छन् ।
यस निर्वाचनमा महँगी, इरानसँगको युद्ध, आप्रवासन नीति र लोकतन्त्रको अवस्थाजस्ता विषय प्रमुख चुनावी मुद्दा बनेका छन् । मध्यावधि चुनावको अन्तिम परिणामले राष्ट्रपति डोनाल्ड ट्रम्पको दोस्रो कार्यकालका बाँकी दुई वर्षमा सरकारका नीति तथा विधायिकी योजनाको कार्यान्वयनमा प्रभाव पार्नेछ ।
