नेपाली कांग्रेसकी महामन्त्री डिला संग्रौलाले इनम सापकोटा प्रकरणलाई लिएर प्रधानमन्त्री बालेन्द्र शाह नेतृत्वको सरकारको आलोचना गरेकी छन्। उनले उक्त घटनाले सत्ताको दुरुपयोग भइरहेको विषय उजागर गरेको दाबी गरेकी छन्।
बुधबार सामाजिक सञ्जालमार्फत धारणा सार्वजनिक गर्दै संग्रौलाले ‘बालेनराजमा प्रश्न प्रतिपक्षलाई मात्रै गरिन्छ ?’ भन्दै सरकारसँग जवाफ मागेकी हुन्।
उनले देशमा सुशासनको सट्टा छाडातन्त्र हाबी हुन थालेको टिप्पणी गर्दै प्रधानमन्त्री को हुन् भन्ने विषयमा समेत आम नागरिक अन्योलमा पर्न थालेको उल्लेख गरेकी छन्।
संग्रौलाले लोकतन्त्रको पहरेदार नेपाली कांग्रेसमाथि सत्ताको दुरुपयोग गरेर आक्रमण गर्न खोजिएको आरोपसमेत लगाएकी छन्। सत्तामा रहेकाहरूका गल्ती सार्वजनिक हुँदा त्यसको जवाफदेहिता लिनुपर्ने उनको भनाइ छ।
हाल कारागारमा रहेका बिचौलिया इनम सापकोटासँग कांग्रेस सभापति गगनकुमार थापाको नाम जोडिएपछि संग्रौलाको यस्तो प्रतिक्रिया आएको हो।
उनले प्रहरी हिरासतमा रहेका अभियुक्तको मोबाइल फोन फरेन्सिक परीक्षण गर्नुअघि प्रधानमन्त्रीका प्रमुख सल्लाहकारले दुई दिनसम्म आफ्नै घरमा राखेको भनिएको विषय पनि सार्वजनिक भइसकेको उल्लेख गरेकी छन्।
उक्त घटनाबारे सत्ता र सत्तारूढ दल राष्ट्रिय स्वतन्त्र पार्टी (रास्वपा) ले स्पष्ट जवाफ दिनुपर्ने संग्रौलाको माग छ।
