अमेरिकाका दुई फरक सहरमा केही घण्टाको अन्तरालमा भएका सामूहिक गोलीकाण्डमा १४ जनाको ज्यान गएको छ। घटनामा बालबालिका र गर्भवती महिलासमेत परेका छन्।
स्थानीय समयअनुसार शुक्रबार साँझ जर्जियाको डगलसस्थित एक घरमा गोली चल्दा पाँच जनाको मृत्यु भएको प्रहरीले जनाएको छ। घटनाबारे सूचना पाएपछि प्रहरी टोली घटनास्थल पुगेको थियो।
त्यसैगरी, पेन्सिलभेनियाको एरीमा भएको अर्को गोलीकाण्डमा नौ जनाको ज्यान गएको छ। मृतकमा दुई बालबालिका र एक गर्भवती महिला पनि रहेको सहर प्रशासनले जनाएको छ। प्रहरी घटनास्थल पुग्नुअघि नै घटनामा संलग्न व्यक्तिसहित नौ जनाको मृत्यु भइसकेको थियो।
पेन्सिलभेनियाका गभर्नर जोश शापिरोले घटनाप्रति दुःख व्यक्त गर्दै प्रभावितलाई सहयोग गर्न प्रशासन तयार रहेको बताएका छन्।
एरीका प्रहरी प्रमुख रिक लोराहले आफ्नो २८ वर्षभन्दा लामो सेवाकालमा यस्तो कठिन घटना नदेखेको बताएका छन्। प्रहरीले दुवै घटनाको कारणबारे अनुसन्धान गरिरहेको छ।
