पीडित युवतीले सामाजिक सञ्जालमार्फत आफूलाई ‘बले’ले अपार्टमेन्टमै जबरजस्ती गरेको आरोप सार्वजनिक गरेपछि घटना चर्चामा आएको थियो। त्यसलगत्तै नेपालमा प्रहरीले उनलाई काठमाडौंको बूढानीलकण्ठबाट पक्राउ गरेको थियो।
हाल ‘बले’लाई अभद्र व्यवहारसम्बन्धी मुद्दामा जिल्ला प्रशासन कार्यालयबाट पाँच दिनको म्याद थप गरी हिरासतमा राखिएको छ। उक्त कसुरमा अधिकतम २५ दिनसम्म हिरासतमा राख्न सकिने कानुनी व्यवस्था छ।
पीडित पक्षका अनुसार युवतीले स्वयं अमेरिकामा उजुरी दर्ता गराएकी हुन् र हाल उनलाई त्यहाँ प्रहरीले विशेष निगरानीमा राखेको छ। उनको स्वास्थ्य अवस्थाको ख्याल राख्दै चिकित्सकीय सेवा, सरकारी वकिल तथा सामाजिक सहयोगसमेत उपलब्ध गराइएको बताइएको छ।
घटनास्थल अमेरिका र आरोपित नेपालमा रहेकाले अनुसन्धान प्रक्रिया कसरी अघि बढाउने भन्ने विषयमा प्रारम्भमा अन्योल भएको परिवारको भनाइ छ। अब भने अमेरिकी र नेपाली प्रहरीबीच समन्वय गरेर थप अनुसन्धान अघि बढ्ने अपेक्षा गरिएको छ। नेपालमा पनि उजुरी दिने वा नदिनेबारे निर्णय भइनसकेको जनाइएको छ।
