सुनसरीको इटहरीमा बम विस्फोट हुँदा दुई जना घाइते भएका छन् ।
घाइते हुनेमा इटहरी उपमहानगरपालिका–२ हलगडाको नवजागृति टोलमा डेरा गरी बस्ने २२ वर्षीय रविन थापा र लमजुङ–५ ढोडेनीका २३ वर्षीय शेरजङ्ग गुरुङ रहेका छन् ।
जिल्ला प्रहरी कार्यालय सुनसरीका अनुसार सोमबार राति थापाको डेराभित्रै बम विस्फोट भएको थियो ।
गएराति साढे १० बजेतिर सो दुर्घटना भएको सुनसरी प्रहरीका प्रवक्ता डिएसपी नरेन्द्र कार्कीले जानकारी दिए ।
घाइते थापाको विराटनगरस्थित आँखा अस्पतालमा उपचार भइरहेको छ भने अर्का गुरुङको धरानस्थित बिपी कोइराला स्वास्थ्य विज्ञान प्रतिष्ठानमा उपचार भइरहेको उनको भनाइ छ ।
घाइतेमध्ये थापाको आँखामा चोट लागेको छ भने गुरुङको शरीरका विभिन्न अङ्गहरूमा चोट लागेको छ ।
विस्फोट भएको बम सुतली बम भएको प्रहरीले जनाएको छ ।
प्रहरी स्रोतका अनुसार थापाको डेरामा गुरुङ १५ दिनअघि आएका थिए । उनले ल्याएको झोलामा उक्त विस्फोटक पदार्थ थियो ।
तथापि, विस्फोट कसरी भयो भन्ने विषयमा अनुसन्धान थालिएको डिएसपी कार्कीले बताए ।
‘घटनास्थलबाट हिमाल सुरक्षा परिषद नेपालको पर्चा बरामद छ’ उनले भने ‘बाँकी हामी अनुसन्धान गरिरहेका छौँ ।’
यता, इलाका प्रहरी कार्यालय इटहरीका डीएसपी खगेन्द्र खड्काका अनुसार उपचारको लागि पठाइएका दुवैको अवस्था सामान्य छ ।
गुरुङ भने विस्फोटका कारण छर्रा लागेर गम्भीर घाइते उनले बताए ।
घटनास्थलबाट प्रहरीले हिमाल सुरक्षा परिषद नेपालको पर्चा बरामद गरेको छ ।
हिमाल सुरक्षा परिषदको पर्चा सशस्त्र युद्धको घोषणा गरेको सङ्गठन भएको प्रहरीले जनाएको छ ।
यो सङ्गठनले गत फागुन १५ गते एक विज्ञप्ति निकाल्दै सशस्त्र युद्धको घोषणा गरेको थियो।
सङ्घीयता खारेज, पाँच विकास क्षेत्र र हिन्दू राष्ट्र कायम गर्नुपर्ने, नागरिकता छानबिन गर्नुपर्ने, भारत–चीन सीमा विवाद समाधान गरिनुपर्ने, स्वदेशी उत्पादनलाई प्राथमिकता दिनुपर्ने, एमसिसी सम्झौता खारेज गरिनुपर्नेलगायत माग राखेर यो सङ्गठनले सशस्त्र युद्धको घोषणा गरेको हो ।
सोही परिषद्ले झापाको बिर्तामोड र दमकमा आतङ्क सिर्जना गरेको थियो ।
गत माघ ९ गते बिर्तामोडको पश्चिम बसपार्क र माघ १३ गते दमक–५ मा रहेको एक चर्चको गेटमा शङ्कास्पद वस्तु राखेकाे आरोपमा नाै जना पक्राउ परेका थिए ।
यो पनि : भाषा परीक्षाका लागि आवेदन खुला
