सुनसरीको धरान उपमहानगरपालिकामा दुईवटा जेब्रा झोलाभित्र फेला परेको मानव अङ्गको पहिचान हुन सकेको छैन ।
बुधबार जेब्रा झोलामा पुरुषको टाउको र खुट्टा भेटिएको स्थान नजिकै बिहीबार बिहान अर्को झोलामा शरीर भेटिएको प्रहरीले जनाएको छ ।
बुधबार दिउँसो धरान–४ नौकिलोस्थित धरान–भेडेटार सडक खण्डनजिक मानिसको टाउको र खुट्टा भेटिएको थियो ।
त्यसपछि तालिमप्राप्त कुकुरसहित अनुसन्धानमा खटिएको इलाका प्रहरी कार्यालय धरानको टोली अर्को जेब्रा झोलाभित्र शरीर फेला पारेको हो ।
शवको पहिचान हुन नसकेपछि प्रहरीले शवको तस्विर सार्वजनिक गरेको छ । सञ्चारमाध्यमलाई पठाइएको उक्त तस्विरमा मृत व्यक्तिको आँखा समेत फुटाइएको छ ।
दुई दिनमा दुई स्थानमा झोलाभित्र प्याक गरेर फालिएको पुरुषको शव भेटिए पनि उनी को हुन् भन्ने पहिचान खुलेको छैन ।
पहिचान हुन नसकेपछि प्रहरीले नै ती पुरुषको अनुहार प्रष्ट देखिने तस्बिर सार्वजनिक गर्दै सनाखतको लागि सहयोग गर्न अपिल गरेको छ ।
प्रहरीका अनुसार शव धरानस्थित वीपी कोइराला स्वास्थ्य विज्ञान प्रतिष्ठानको शव गृहमा राखिएको छ ।
सुनसरी प्रहरी प्रवक्ता नरेन्द्र कार्कीले अनुसार बीभत्स अवस्थामा शवका टुक्रा भेटिएको स्थानबाट करिब एक किलोमिटर माथिल्लो भागमा अर्को जेब्रा झोला फेला परेको हो ।
स्थानीय खड्गबहादुर तामाङ र उनको पत्नी दाउरा खोज्न जङ्गल गएका बेला जेब्रा झोलाभित्र खुट्टा र टाउको देखेर प्रहरीलाई खबर गरेका थिए ।
शव भेटिएका मानिसको उमेर करिब ४० देखि ४२ वर्ष भएको हुन सक्ने प्रहरीको अनुमान छ ।
घटनास्थल धरान–१३ को जिरोपोइन्टबाट लगभग ९ किलोमिटर उत्तरमा पर्छ ।
