विराटनगर । विराटनगरमा प्राविधिक शिक्षा तथा सीप सम्बन्धी शैक्षिक मेला तथा प्रदर्शनी सञ्चालन हुने भएको छ ।
कोशी प्रदेश सरकारको सामाजिक विकास मन्त्रालयसँगको समन्वय तथा प्राविधिक शिक्षा तथा व्यावसायिक तालीम परिषद् (सिटिभिटि) कोशी प्रदेश कार्यालयको आयोजनामा आगामी जेठ २ र ३ गते सीप सम्बन्धी शैक्षिक मेला तथा प्रदर्शनी सञ्चालन हुने भएको हो ।
आयोजक समिति सदस्य पवन भण्डारीका अनुसार मेलाको उद्घाटन जेठ २ गते बिहान ९ बजे हुनेछ ।
‘सीप आजको आवश्यकता, भविष्यको सुनिश्चितता’ भन्ने मूल नारासहित श्री आदर्श माध्यमिक विद्यालयमा हुने मेलामा कोशी प्रदेशका १४ जिल्लाबाट शिक्षक, विद्यार्थी, अभिभावक तथा जनप्रतिनिधिहरुको सहभागिता रहनेछ ।
मेलामा स्वास्थ्य, इन्जिनियरिङ, कृषि, सूचना प्रविधि लगायतका विषयमा अध्ययनरत विद्यार्थीहरूले आफ्ना सीप र परियोजनाको प्रदर्शनी गर्नेछन् ।
साथै ४० वटा शैक्षिक स्टल, करियर परामर्श, छात्रवृत्ति तथा भर्ना सम्बन्धी जानकारीसमेत उपलब्ध गराइने आयोजकले जनाएको छ ।
दुई दिनसम्म सञ्चालन हुने मेलामा हजारौँको सहभागिता रहने अपेक्षा गरिएको छ ।
