विराटनगर । कोशी प्रदेशसभा सदस्य तथा पूर्वमन्त्री गणेश उप्रेतीले राहतका लागि खरिद गरेको खाद्यवस्तु काम नलाग्ने अवस्थामा पुग्नु र त्यसलाई गुपचुप नष्ट गर्नु गलत भएको बताएका छन् ।
मंगलबार प्रेस विज्ञप्ति जारी गर्दै सांसद उप्रेतीले समयमा राहत र किसानलाई अनुदान वितरण नगरी नष्ट हुने अवस्था आउनु दुःखद भएको भन्दै घटनाप्रति आफ्नो ध्यानाकर्षण भएको बताएका हुन् ।
सांसद उप्रेतीले जनतालाई वितरण गर्नुपर्ने सामान गोदाममा थन्क्याएर राख्ने र काम नलाग्ने अवस्थामा पुगेपछि कुनै कानुनी प्रक्रिया पूरा नगरी रातारात नष्ट गरेको आशंका गरेका छन् ।
उनले खरिद प्रक्रियामाथि नै प्रश्न उठ्न सक्ने देखिएको घटनाको सत्यतथ्य छानविन गर्न नगरपालिकाको नेतृत्वलाई आग्रह गरेका छन् ।
रतुवामाई नगरपालिकामा माटोमुनि गाडेको अवस्थामा खाद्य सामग्री र बीउ-बिजन फेला परेको थियो ।
नगरपालिकाले कोरोना समयमा विभिन्न दातृ संस्थाले दिएको अनुदानको खाद्य सामग्री, विभिन्न प्रकारका बीउ-बिजन रतुवाखोला किनारमा गाडेको भेटिएको थियो ।
शुक्रबार स्थानीयले पाएको सूचनाका आधारमा सञ्चारकर्मीलाई लिएर केही सामाजिक अगुवाहरू रतुवामाई–७ को रतुवाखोला किनारमा रहेको डम्पिङ साइडमा उत्खनन् गरेका थिए ।
डम्पिङ साइडको छेउमा झार नउम्रिएको बालुवा भेटिएपछि स्थानीयले सोही ठाउँमा उत्खनन गरेर हेर्दा क्षेत्रीय कृषि निर्देशनालय विराटनगरले अनुदानमा दिएको गड्यौला मल (भर्मी कम्पोष्ट) भेटिएको थियो ।
२५ केजीको सात बोरा मल भेटिएपछि स्थानीयले जनप्रतिनिधि र प्रहरीलाई खबर गरेका थिए ।
प्रहरी, नगरपालिका प्रमुख प्रशासकीय अधिकृत सञ्जय राजलवट, लेखा अधिकृत रिता सिग्देल, प्रशासन शाखाका अधिकृत नरहरि निरौला र नगर प्रमुख नागेश्वरप्रसाद सिंहसहितको टोली घटनास्थलमा पुगेपछि जेसीवी लगाएर थप उत्खनन गरिएको थियो ।
उत्खनन गर्दा दुई बोरा बीउ-बिजन, थप चार बोरा मल, नुन, दुई बोरा कुहिएको चामल, तेलका पाउच, दाल एक बोरा र सावुन भेटिएको थियो ।
