विराटनगर । मोरङको रतुवामाई नगरपालिकाले दातृ निकायबाट प्राप्त खाद्यान्न सामग्री तथा बिउबिजन गाडेको विषयलाई लिएर नगरप्रमुखलाई ज्ञापनपत्र बुझाइएको छ ।
आइतबार नेकपा माओवादी केन्द्रको नगर कमिटीले नगरप्रमुख नागेश्वरप्रसाद सिंहलाई ज्ञापनपत्र बुझाउँदै छानबिन गरी उक्त गैर-जिम्मेवारपूर्ण काममा संलग्नलाई कारबाही गर्न आग्रह गरेको हो ।
रतुवामाई नगरपालिकामा माटोमुनि गाडेको अवस्थामा खाद्य सामग्री र बीउ-बिजन फेला परेपछि अहिले स्थानीय आक्रोशित बनेका छन् ।
नगरपालिकाले कोरोना समयमा विभिन्न दातृ संस्थाले दिएको अनुदानको खाद्य सामग्री, विभिन्न प्रकारका बीउ-बिजन रतुवाखोला किनारमा गाडेको भेटिएको थियो ।
शुक्रबार स्थानीयले पाएको सूचनाका आधारमा सञ्चारकर्मीलाई लिएर केही सामाजिक अगुवाहरू रतुवामाई–७ को रतुवाखोला किनारमा रहेको डम्पिङ साइडमा उत्खनन् गरेका थिए ।
डम्पिङ साइडको छेउमा झार नउम्रिएको बालुवा भेटिएपछि स्थानीयले सोही ठाउँमा उत्खनन गरेर हेर्दा क्षेत्रीय कृषि निर्देशनालय विराटनगरले अनुदानमा दिएको गड्यौला मल (भर्मी कम्पोष्ट) भेटिएको थियो ।
२५ केजीको सात बोरा मल भेटिएपछि स्थानीयले जनप्रतिनिधि र प्रहरीलाई खबर गरेका थिए ।
प्रहरी, नगरपालिका प्रमुख प्रशासकीय अधिकृत सञ्जय राजलवट, लेखा अधिकृत रिता सिग्देल, प्रशासन शाखाका अधिकृत नरहरि निरौला र नगर प्रमुख नागेश्वरप्रसाद सिंहसहितको टोली घटनास्थलमा पुगेपछि जेसीवी लगाएर थप उत्खनन गरिएको थियो ।
उत्खनन गर्दा दुई बोरा बीउ-बिजन, थप चार बोरा मल, नून, दुई बोरा, कुहिएको चामल, तेलका पाउच, दाल एक बोरा र सावुन भेटिएको थियो ।
किसानलाई अनुदानमा दिन ल्याएको मल र तरकारीको बीउ-बिजन नष्ट भएपछि विरोध गर्दै माओवादी केन्द्र रतुवामाई नगर कमिटीले नगरप्रमुखसमक्ष ज्ञापनपत्र बुझाएका हुन् ।
यथाशीघ्र आफूहरूको माग सम्बोधन नभए र नगरबासीले उठाएका आवाजहरूको बेवास्ता गरिएमा कडाभन्दा कडा आन्दोलन गर्ने चेतावनीसमेत नगर कमिटीको छ ।
