सर्लाही । प्रहरीले चलाएको गोली लागेर मृत्यु भएका सर्लाहीको बरहथवा नगरपालिका–६, का ३० वर्षीय शिवशंकर साहको शव अझै उठ्न सकेको छैन ।
प्राथमिक स्वास्थ्य केन्द्र बरहथवाको स्तरोन्नतिको विवादमा भएको प्रदर्शनमा प्रहरीले चलाएको गोली लागेर शुक्रबार मृत्यु भएको थियो ।
नेपाली कांग्रेस, जनमत, जसपासहितका दलले गरेको प्रदर्शन नियन्त्रणबाहिर गएपछि प्रहरीले गोली चलाएको थियो, जसक्रममा मृत्यु भएका शिवशंरको शव तीन दिनदेखि घटनास्थलमै छ ।
प्रदर्शनकारीले विभिन्न माग राखेर मृतकको शव घटनास्थलबाट उठाउन दिएका छैनन् ।
स्थानीय शुक्रबार दिउँसोदेखि नै मृतकको शव सडकमै रुँगेर बसेका छन् । उनीहरू माग पूरा नहुन्जेल शव उठाउन नदिने भन्दै कठ्याङग्रिदो चिसोमा सडकमै बसिरहेका हुन् ।
सरकारले तीन सदस्यीय छानबिन समिति बनाएर घटनाको छानबिन गरी दोषीलाई कारबाही गर्ने र मृतकको परिवारलाई राहत स्वरूप १० लाख रुपियाँ दिने निर्णय गरे पनि यहाँ आन्दोलन रोकिएको छैन ।
गएको शुक्रवारदेखि नै बरहथवा बजार खुल्न सकेको छैन । नयाँरोड–बरहथवा सडकमा यातायात चल्न सकेका छैन । तीन दिनदेखिको बन्दले सर्वसाधारण प्रभावित बनिरहेका छन् ।
