नेपाली महिला फुटबलकी सुपरस्टार सावित्रा भण्डारी (साम्बा) बिहीबारबाट सुरु हुने राष्ट्रिय महिला लिगमार्फत मैदान फर्किने तयारीमा छन् ।
दोस्रो संस्करणको राष्ट्रिय महिला लिग फुटबल बिहीबार (आज) देखि चितवनमा सुरु हुँदै छ ।
लिगको उद्घाटन खेलमा विभागीय टोली साविक विजेता एपिएफ र त्रिभुवन आर्मी क्लब भिड्दैछन् ।
सोही खेलमार्फत् सावित्रा मैदान फर्किन लागेकी हुन् ।
गत वर्ष लिगअन्तर्गत विभागीय प्रतिद्वन्द्वी नेपाल पुलिस क्लबविरुद्धको खेलमा घुँडामा गम्भीर चोट लागेपछि उनी मैदानबाहिर रहँदै आएकी थिइन् ।
साम्बाले १३ महिनापछि मैदानमा कमब्याक गर्ने भएकी हुन् ।
२४ वर्षीया साम्बाले दायाँ घुँडाको एन्टेरिएर क्रुसिएट लिगामेन्टको गम्भीर चोट बोकेकी थिइन् ।
गत वर्ष फागुनमा राष्ट्रिय महिला लिग खेल्ने क्रममा उनले चोट बोकेकी थिइन् ।
३ फागुन २०७७ मा चोट बोकेकी उनले त्यसयता मैदान प्रवेश गर्न पाएकी थिइनन् ।
सावित्राको गत असारमा कतारको दोहास्थित अस्पेटारमा शल्यक्रिया भएको थियो ।
शल्यक्रियापछिको रिह्याब सकेर सावित्रा झन्डै डेढ महिनाअघि स्वदेश फर्केकी थिइन् ।
त्यसयता उनी लगातार एपिएफको प्रशिक्षणमा सामेल भइरहेकी छन् ।
उपाधि रक्षाको अभियानमा सशस्त्र प्रहरी बलको एपिएफलाई साम्बाको पुनरागमन महत्वपूर्ण हुन सक्छ ।
आजदेखि सुरु हुने लिगको पूर्वप्रधानमन्त्री एवम् नेकपा माओवादी केन्द्रका अध्यक्ष पुष्पकमल दाहाल (प्रचण्ड) ले उद्घाटन गर्नेछन् ।
उद्घाटनको दिन निःशुल्क प्रवेशको व्यवस्था गरिएको छ ।
अखिल नेपाल फुटबल सङ्घ (एन्फा) ले भरतपुर महानगरपालिकाको सहकार्यमा लिगका पहिलो चरणका खेलहरू चितवनमा सञ्चालन गर्न लागेको हो ।
दोस्रो चरणका खेल विराटनगरमा हुने एन्फाले जनाएको छ ।
लिगमा समावेश ५६ खेलमध्ये पहिलो चरणका २८ खेल कृष्णपुर खेल मैदान र भरतपुर–१९ को खेल मैदानमा हुने छन् ।
बाँकी खेल विराटनगरमा हुने छन् ।
लिगमा तीन भिागीय टोलीहरू नेपाल पुलिस क्लब, त्रिभुवन आर्मी क्लब र शशस्त्र प्रहरी बल (एपिएफ) सहित, विराटनगर महानगरपालिका, वालिङ नगरपालिका, चन्द्रपुर नगरपालिका, धनगढी उपमहानगरपालिका र ललितपुर महानगरपालिकाको सहभागिता रहने छ ।
उद्घाटन खेल दिउँसो ४ बजेबाट सुरु हुने छ ।
लिग विजेताले २० लाख र दोस्रो हुने टोलीले १० लाख रुपैयाँ पाउने छ ।
तेस्रो हुने टोलीले ५ लाख तथा चौथोले ३ लाख रुपैयाँ प्राप्त गर्ने एन्फाले जानकारी दिएको छ ।
यस्तै फेयर प्ले टिमले १ लाख रुपैयाँ पाउने छ ।
लिगको सर्वोकृष्ट खेलाडीले स्कुटर, उत्कृष्ट गोलरक्षक र उत्कृष्ट स्ट्राइकरले समान ५०–५० हजार तथा उदयमान खेलाडीले २५ हजार प्राप्त गर्नेछन् ।
हरेक खेलको प्लयर अफ दि म्याचले १० हजार प्राप्त गर्नेछन् ।
