पश्चिमी न्यून चापीय प्रणालीको प्रभावले भोलिदेखि शनिबारसम्म नेपालको मौसममा बदली देखिने मौसम पूर्वानुमान महाशाखाले जनाएको छ ।
बुधबार राति पश्चिम नेपालबाट प्रवेश गर्न लागको चापीय प्रणालीले नेपालको हवाई क्षेत्र, पर्वतारोहण, कृषि, यातायात लगायत दैनिक जनजीवनमा समेत असर पार्न सक्ने भन्दै सुरक्षित र सतर्क रहन महाशाखाले सबैलाई अनुरोध गरेको छ ।
बिहिबारदेखि सुदूरपश्चिम, कर्णाली, लुम्बिनी र गण्डकी प्रदेशको मौसममा सामान्यदेखि पूर्ण बदली हुने महाशाखाले बताएको छ ।
चार प्रदेशसँगै वाग्मती र प्रदेश १ का उच्च पहाडी तथा हिमाली भू–भागका धेरै स्थानमा हल्का हिमपात र पहाडी तथा तराईमा मेघ गर्जन र चट्याङसहित वर्षा (हल्कादेखि मध्यम) हुने सम्भावना रहेको छ ।
यस्तै, सोही अवधिमा मधेश प्रदेशको मौसममा आंशिकदेखि सामान्य बदली रहेनछ ।
शुक्रबार देशैभरका उच्च पहाडी तथा हिमाली भू–भागमा हिमपात र पहाडी तथा तराईका धेरै स्थानमा मेघ गर्जन, चट्याङ र असिनासहितको वर्षा कायम रहने जानकारी महाशाखाले दिएको छ ।
महाशाखाका अनुसार लुम्बिनी र गण्डकी प्रदेशका केही स्थानमा भने भारी वर्षाको सम्भावना रहेको छ ।
शनिबारदेखि भने हिमपात र वर्षामा कमी हुने महाशाखाले बताएको छ ।
विशेषतः शनिबार गण्डकी, वाग्मती र प्रदेश १ का उच्च पहाडी तथा हिमाली क्षेत्रमा मध्यम हिमपातको सम्भावना रहनेछ भने पहाडी र तराईका केही स्थानमा वर्षा हुने सक्ने अनुमान महाशाखाको छ ।
आइतबारदेखि भने प्रणाली कमजोर हुँदै जाने भएकाले देशैभरका मौसममा क्रमिक रुपमा सुधार हुने महाशाखाले बताएको छ ।
