शरीरमा एकसाथ ८५ वटा चम्चा अड्याएर इरानका ५० वर्षीय व्यक्तिले विश्व कीर्तिमान कायम गरेका छन् ।
एबोलफाजल मोख्तारीले यस्तो अनौठो कीर्तिमानसहित गिनिज बुकमा आफ्नो नाम लेखाएका हुन् ।
इरानको अकराजमा बस्ने माेख्तारी आफू बच्चादेखि नै आफ्नो शरीरमा चम्चा अड्याउने अभ्यास गर्दै आएको बताउँछन् ।
‘म सानो छँदा नै मेरो यो क्षमताबारे थाहा पाएको थिएँ’ गिनिज वुक अफ वल्र्ड रेकर्डस्सँग कुरा गर्दै उनले भनेका छन्, ‘धेरै वर्ष लगाएर मेहनत गरेपछि आज बल्ल यो सफलता प्राप्त गरेको छु ।’
मोख्तारीका अनुसार सामानमा आफ्नो शरीरको उर्जा सार्न सक्नु नै उनको अद्भुत क्षमताको भित्री रहस्य हो ।
निकै अघिबाट कीर्तिमानको तयारी गर्दै आएका मोख्तारीले आफ्नो तेस्रो प्रयासमा विश्व कीर्तिमान बनाउन सफल भएका हुन् ।
सतहका बनावट अनुसार उनी प्लास्टिक, गिलास, फलफूल, ढुङ्गा, काठ जिउँमा अड्याउन सक्छन् ।
अच्म्म त के भने माेख्तारी मानिसकाे बच्चासमेत आफ्नो जिउमा टाँसेर अड्याउन सक्ने दाबी गर्छन् ।
स्पेनको मार्कोस रुइज सेबालोसकाको विश्व कीर्तिमानलाई तोड्दै मोख्तारीले नयाँ रेकर्ड बनाएका हुन् ।
माेख्तारीभन्दा अघि मार्काेसले ६४ वटा चम्चा अड्याएर विश्व कीर्तिमान कायम गरेका थिए ।
