नेपालको जनसङ्ख्या दुई करोड ९१ लाख ९२ हजार चार सय ८० पुगेको छ ।
केन्द्रीय तथ्याङ्क विभागले राष्ट्रिय जनगणना २०७८ को प्रारम्भिक विवरण सार्वजनिक गरेको छ ।
बुधबार सार्वजनिक विवरणअनुसार नेपालको जनसङ्ख्या दुई करोड ९१ लाख ९२ हजार चार सय ८० पुगेको हो ।
नेपालमा पुरुषको तुलनामा महिलाको सङ्ख्या धेरै छ ।
जसमा पुरुषको जनसङ्ख्या १ करोड ४२ लाख ९१ हजार तीन सय ११ र महिलाको जनसङ्ख्या एक करोड ४९ लाख एक हजार एक सय ६९ छ ।
प्रारम्भिक विवरणअनुसार विदेशमा रहेका नेपालीको जनसङ्ख्या २१ लाख ६९ हजार चार सय ७८ रहेको छ ।
नेपालमा जम्मा परिवार सङ्ख्या ५६ लाख ४३ हजार ९ सय ४५ रहेको छ ।
जनसङ्ख्याको वृद्धिदर शून्य दशमलव ९३ रहेको छ ।
यसअघि २०६८ सालको जनगणनाअनुसार नेपालको जनसङ्ख्या २ करोड ६४ लाख ९४ हजार ५ सय ४ थियो ।
यसमा पुरुषको जनसङ्ख्या १ करोड २८ लाख ४९ हजार ४१ र महिलाको १ करोड ३६ लाख ४५ हजार ४ सय ६३ थियो ।
यस्तै, १० वर्षअघिको जनगणनाअनुसार घरपरिवारको सङ्ख्या ५४ लाख २३ हजार २ सय ९७ थियो ।
विभागका उपनिर्देशक हेमराज रेग्मीका अनुसार २०७८ सालको जनगणनाको विस्तृत तथ्याङ्क भने ६ महिनाभित्र आउने छ ।
